Некқадам Шоҳназаров, ҳунарманди театру синамо дар барномаи “Ногуфтаҳо”-и Орзу Исоев дар бораи муҳаббати беинтиҳо ба модараш ва бехонагиву иҷорашиниаш гуфт.

Ин ҳунарманди тоҷик мегӯяд, ки бо вуҷуди аз соли 1997 дар театр кор кардан, наметавонад барои харидани хонаи шахсӣ дар пойтахт маблағ ҷамъ кунад, зеро бо маоше, ки аз театр мегирад, ҳатто зиндагиро бо мушкилӣ пеш мебарад. “Ҳоло аз театр 2400 сомонӣ маош мегирам ва маблағи хонаи иҷораам 1500 сомонӣ аст”, - меафзояд ӯ.

Дар шарҳи барнома корбароне навиштаанд, ки хуб мешавад, саховатмандон, махсусан Раҳими Ғармӣ ба ин ҳунарманди маҳбуб хонае туҳфа кунад. Шарҳнависон медонанд, ки дар гузашта Раҳими Ғармӣ ба ҳунармандоне чун Бахтиёр Раҳимов (Ғарибшо) ва Гулбаҳор Ғаффорова пас аз барномаи “Ногуфтаҳо” хона туҳфа карда буд.

Некқадам Шоҳназаров ҳамчунин, дар бораи меҳри беинтиҳояш нисбат ба модараш ҳарф зад. “Дар зиндагӣ аз ҳама зиёд аз марги модар метарсидам. Бовар кунед, ҳатто вақти зинда буданашон, аз дидорашон сер намешудам. Баъзан мегуфтам, ки Худоҷон маро пеш аз модарам бикуш, аммо боз мегуфтам, ки дарди фарзандро чӣ гуна таҳаммул мекунанд?”

Ин ҳунарманди тоҷик меафзояд: “Мӯйи сари модарамро аз болои қолин ва шонааш дона-дона чидам ва дар рӯймолчае то ҳол нигоҳ медорам. Фикр мекунам, ки ҳоло ҳам модарам бо ман аст”.

Dialog.tj