Вазорати корҳои хориҷии Тоҷикистон хабар дод, ки ҷониби Тоҷикистон пешниҳод кард, ҷашни Меҳргон ва санъати сохтану навохтани рӯбоб ба номинаи муштараки рӯйхати Феҳристи мероси ғайримодии башарият дар ЮНЕСКО ворид карда шавад.

Тибқи иттилои Вазорати корҳои хориҷии Тоҷикистон рӯзи 2-юми декабр дар шаҳри Асунсони Парагвай ҷаласаи 19-уми Кумитаи байниҳукуматӣ оид ба ҳифзи мероси фарҳангии ғайримодии ЮНЕСКО оғоз гардида ва то 7-уми декабр идома меёбад.

Дар ҷаласаи Кумита намояндагон аз кишварҳои узви Конвения ва Тоҷикистон низ ширкат доштаанд. Тоҷикистон дар ҷаласа пешниҳод кардааст, ки ҷашни Меҳргон ва санъати сохтану навохтани рӯбоб ба унвони мероси ғайримодии ЮНЕСКО пазируфта шавад.

Ҷашни Меҳргон ҳар сол дар Тоҷикистон таҷлил мегардад. Он чун рамзи шукргузорӣ аз неъматҳои табиату меҳнати деҳқон ва арҷгузорӣ ба ваҳдати инсон ҷашн гирифта мешавад. Ҳукумати Тоҷикистон соли 2009 дар бораи эҳёи ҷашни Меҳргон қарор қабул кард ва онро ба рӯйхати идҳои расмӣ дохил намуд.

Рӯбоб сози мусиқии миллӣ аст, ки дар Тоҷикистон корбурди васеъ дорад. Дар Тоҷикистон санъати рӯбобсозӣ низ рушд кардааст, ки аз ҷониби ҳунармандон рӯбобҳои зебо ва хуб сохта мешавад.

Dialog.tj