Тибқи раддабандии Созмони ҷаҳонии сайёҳӣ дар бахши “Беҳтарин макони сайёҳӣ аз ҷиҳати қабули сайёҳони хориҷӣ” аз моҳи январ то моҳи июли соли ҷорӣ Тоҷикистон аз рӯйи ҳисоби афзоиши теъдоди сайёҳон баъди Албания ва Сербия дар ҷойи сеюм қарор гирифт.

Кумитаи рушди сайёҳии назди Ҳукумати Ҷумҳурии Тоҷикистон хабар дод, ки раддабандии зикршуда дар доираи машварати омӯзишӣ дар шаҳри Бангкоки Таиланд эълон гардид.

Бар асоси раддабандии дигари Созмони ҷаҳонии сайёҳӣ Тоҷикистон дар самти “Бозорҳои беҳтарини сайёҳӣ аз рӯйи хароҷоти сайёҳии содиротӣ” бо афзоиши якбораи сайёҳии содиротӣ (420+) дар садри рӯйхати ин Созмон қарор гирифт. Баъди Тоҷикистон кишварҳои Сербия, Непал, Латвия, Ирландия, Туркия ҷойгир шудаанд.

Бояд зикр кард, ки дар машварати омӯзишӣ 41 нафар мутахассисону коршиносони соҳаи сайёҳӣ аз 30 кишвари Осиё ва минтақаи Уқёнуси Ором ширкат намуданд. Тоҷикистонро дар ин машварати омӯзишӣ Баҳрулло Муқимов намояндагӣ намуда, дар мавзӯи “Рушди ҳунарҳои мардумӣ дар минтақаҳои дурдаст” маъруза намуд.

Дар машварати омӯзишӣ намояндаи Созмони ҷаҳонии сайёҳии Созмони Милали Муттаҳид Клавдиа Виейра таъкид намуд, ки соҳаи сайёҳӣ яке аз бахшҳои муҳимми иқтисоди миллӣ ва иҷтимоӣ дар Осиё ва минтақаи Уқёнуси Ором мебошад. Таъкид гардид, ки дар соли 2023 дар минтақаҳои зикршуда теъдоди сайёҳон ба 238 миллион нафар расид.

Dialog.tj