Эмомалӣ Раҳмон, президенти Ҷумҳурии Тоҷикистон рӯзи 28-уми ноябр дар шаҳри Остонаи Ҷумҳурии Қазоқистон дар ҳамоиши Шурои амнияти дастаҷамъии Созмони Аҳдномаи амнияти дастаҷамъӣ иштирок ва суханронӣ намуданд.

Дар ҷаласа сарони кишварҳои Беларус, Қазоқистон, Қирғизистон, Дабири кулли СААД иштрок намуданд.

Дар ҳамоиши навбатии СААД масъалаҳои вобаста ба вазъи низомию сиёсии ҷаҳон ва минтақаҳои амнияти дастаҷамъӣ, таҳкими ҳамкорӣ дар доираи созмон ва дурнамои рушди низоми амнияти дастаҷамъӣ, инчунин, рафти омодагиҳо ба таҷлили муштараки 80-солагии ҷашни Ғалаба мавриди баррасӣ қарор гирифт.

Сарони узви созмони СААД оид ба роҳҳои таҳким ва густариши робитаҳо дар доираи СААД бо дигар созмонҳои минтақавию ҷаҳонӣ ва нақшаи чорабиниҳои Созмон дар соли 2025 табодули афкор намуданд.

Эмомалӣ Раҳмон, президенти Ҷумҳурии Тоҷикистон дар ҳамоиши зикршуда таваҷҷуҳи иштирокдоронро ба таъсири манфии шиддатёбии вазъи ҳарбӣ-сиёсии минтақа ва ҷаҳон ба кишварҳои аъзои созмони зикршуда ҷалб намуда, дар ин бора, аз ҷумла чунин таъкид намуданд: “Ҳамаи масъалаҳои рӯзномаи имрӯза воқеияти кунуниро инъикос мекунанд ва мо ҷонибдори қабули қарорҳои муносиб доир  ба онҳо ҳастем”.

Президенти Тоҷикистон аз қабули Барномаи байнидавлатии ҳадафманди СААД оид ба таҳкими марзи Тоҷикистону Афғонистон изҳори сипос намуданд.

Дар анҷоми ҳамоиш, сарони кишварҳо як қатор санадҳо, аз ҷумла Эъломияи Шурои амнияти дастаҷамъии Созмони Аҳдномаи амнияти дастаҷамъӣ, қарор дар бораи тасдиқи Барномаи ҳадафманди байнидавлатии СААД оид ба таҳкими марзи Тоҷикистону Афғонистон ва ғайраро тасвиб намуданд.

Dialog.tj