Маркази хабарнигорони Афғонистон дар Рӯзи ҷаҳонии телевизион эълон кард, ки тайи як соли охир 12 телевизион дар ин кишвар бо дастури гурӯҳи террористии Толибон баста шудааст.

Дар тадқиқоти Маркази хабарнигорони Афғонистон, ки чанд рӯз қабл нашр гардид, таъкид шудааст, гурӯҳи Толибон алорағми тасдиқи қонуни расонаҳои ҳамагонии Афғонистон ва эълони бархе тағйирот дар он ба бастани ВАО, аз ҷумла телевизион идома медиҳанд. Ин марказ таъкид мекунад, ки дастурамалҳои қабулнамудаи Толибон дар мавриди фаъолияти ВАО боиси маҳдудияти кори на фақат телевизионҳо, балки дигар ВАО дар ин кишвар мегардад.

Ба таъкиди ин марказ, манъи ҳузури занон дар телевизионҳо, манъи пахши барномаҳои телевизионҳои байналмилалӣ, пешгирӣ аз тасвирбардорӣ ва мусоҳибаи тасвирӣ, манъи гуфтугӯи зинда ва даъват накардан аз коршиносоне, ки мавриди тасдиқи гурӯҳи зикршуда нест, аз ҷумлаи дастурамалҳое ҳастанд, ки фаъолияи ВАО –ро маҳдуд мекунанд.

Маркази хабарнигорони Афғонистон, ҳамчунин, таъкид намудааст, ки дар ин муддат 30 хабарнигор боздошт шудаанд ва аз теъдоди боздоштшудагон 7 нафар ҳамчунон дар зиндон ба сар мебаранд.

Dialog.tj