Далер Ҷумъа, вазири энергетика ва захираҳои оби Ҷумҳурии Тоҷикистон дар Муколамаи сатҳи баланд оид ба пешбурди рӯзномаи кӯҳӣ ва навсозии мавзӯи кӯҳҳо ва тағйирёбии иқлим, ки аз ҷониби Ҷумҳурии Қирғизистон дар ҳошияи Конфронси 29-уми ҷонибҳои Конвенсияи қолабии Созмони Милали Муттаҳид оид ба тағйирёбии иқлим баргузор гардид, иштирок ва суханронӣ намуд.

Далер Ҷумъа дар ин нишасти муҳим таъкид кард, ки Тоҷикистон кишвари кӯҳистонӣ буда, 93 фоизи онро кӯҳҳо ташкил дода, нисфи ҳудуди кишварро баландиҳои зиёда аз 3000 метр аз сатҳи баҳр фаро мегирад. Ӯ таъкид намуд, ки зиёда аз 60 фоизи захираҳои оби Осиёи Марказӣ аз ҳисоби пиряхҳои Тоҷикистон ҳосил мешавад.

Вазири энергетика ва захираҳои оби ҷумҳурӣ ҳамчунин, таъкид кард, ки дар кӯҳҳои Тоҷикистон зиёда аз 24 қуллаи баландиаш беш аз 6000 метр мавҷуд аст, ки онҳо манбаи маъданҳои фоиданок, ҷангалҳо ва маҳсулоти кишоварзӣ буда, макони пиряхҳо, кӯлҳо ва дарёҳо мебошанд. Шаш фоизи ҳудуди ҷумҳуриро пиряхҳо дар бар мегиранд, ки байни онҳо пиряхи Ванҷях машҳур мебошад.

Далер Ҷумъа дар ин нишаст обшавии босуръати пиряхҳоро дар натиҷаи тағйирёбии иқлим ба раванди ҷаҳонии ҳифзи захираҳои об таҳдиди ҷиддӣ донист: “Дар 30 соли охир аз 14 ҳазор пиряхи Тоҷикистон беш аз 1000 пиряхи барои тамоми минтақа муҳим аз байн рафтааст. Раванди зуд обшавии пиряхҳо дар натиҷаи баланд шудани ҳарорати ҳаво боиси афзоиши офатҳои табиӣ ва вайроншавии экосистемаи обӣ гардид”.

Dialog.tj