Эмомалӣ Раҳмон, муҳтарам президенти Ҷумҳурии Тоҷикистон дар нишасти сарони кишварҳои узви БРИКС, ки дар шаҳри Қазони Ҷумҳурии худмухтори Тотористони Федератсияи Русия баргузор гардид, аз рушди бениҳоят хавфноки вазъият дар Ховари Миёна ва авҷ гирифтани низоъҳо, ки боиси талафоти бузург шудаанд, изҳори нигаронӣ карданд.

Сарвари давлат оид ба равандҳои хатарангези сиёсӣ, таҳдидҳои терроризми байналмилалӣ, ифротгароӣ, тундгароӣ, киберҷинояткорӣ, гардиши ғайриқонунии силоҳ ва маводи мухаддир ва дигар ҷиноятҳои муташаккили  фаромарзӣ суханронӣ намуда, афзуданд, ки “Тоҷикистон пайваста ҷонибдори густариши ҳамкорӣ бо тамоми ширикони байналмилалӣ дар мубориза бо ин таҳдиду хатарҳо мебошад”.

Дар ин нишаст президенти кишвар таъкид намуданд, ки “Раванди Душанбе” дар самти мубориза бо терроризм ва маблағгузории он ҳамкориҳои бисёрҷониба ба роҳ мондааст. Таъкид гардид, ки ҳама гуна масъалаҳои баҳсбарангез, низоъ ва ихтилофҳо бояд бо роҳи сиёсӣ ва дипломатӣ ҳал шаванд.

Сарвари давлат дар суханронии худ оид ба тағйирёбии иқлим ва оқибатҳои фоҷеабори он андешаронӣ намуда, таъкид карданд, ки моҳи майи соли 2025 Тоҷикистон тибқи қатъномаи Маҷмаи Умумии Созмони Милали Муттаҳид баргузор намудани конфронси байналмилалии сатҳи баланд оид ба ҳифзи пиряхҳоро дар шаҳри Душанбе ба нақша гирифтааст ва аз сарони давлатҳо хост, дар ин чорабинии муҳим иштирок намоянд.

Dialog.tj