Дар доираи лоиҳаи муштараки Кумитаи ҳолатҳои фавқулода ва мудоифаи граждании Ҷумҳурии Тоҷикистон ва Бонки ҷаҳонӣ, ки ба беҳтар намудани омодагӣ ва муҳофизат аз офатҳои табиӣ дар Тоҷикистон равона шудааст, барои тайёр кардани мутахассисон (наҷотдиҳандагон) таҷҳизоти воқеияти виртуалӣ (VR)  харида шуд. Дар ин бора аз КҲФ хабар доданд.

Гуфта мешавад, вазифаи асосии таҷҳизоти харидашуда ташкили тренингҳои омӯзишӣ барои кормандони КҲФ мебошад, ки дар бартараф кардани оқибати ҳодисаҳои фавқулода иштирок мекунанд. Омӯзиши наҷотдиҳандагон бо истифода аз технологияҳои VR дар Маркази миллии таълимӣ ҳанӯз идома дорад. 

Дар давоми омӯзиш кормандони КҲФ имконият пайдо карданд, ба фазои виртуалӣ, ки дар он ҳолатҳои гуногун, ба монанди сӯхтор, заминларза ва обхезиҳо оварда мешаванд, ворид шаванд. Истифодаи воқеияти виртуалӣ ба иштирокчиён имкон медиҳад, ки малакаҳои худро сайқал дода ва дар шароити ба воқеият наздиктарин қарорҳои дуруст қабул намоянд.

Dialog.TJ