Тоҷирони Тоҷикистон дар минтақаи Павлодари Қазоқистон ярмаркаи фурӯши маҳсулоти маваҷоти Тоҷикистонро ба роҳ мондаанд. Тибқи иттилои хабаргузории “Казинформ” иқдоми мазкур дар доираи таҳкими равобити иқтисодии Тоҷикистону Қазоқистон сурат мегирад.

Маваҷот барои фурӯш дар ярмарка аз Тоҷикистон оварда шудааст ва 15 – 20 дарсад аз нархи бозор арзонтар фурӯхта мешавад. Тоҷирон таъкид кардаанд, ки  фурӯши маваҷоти Тоҷикистонро дар бозорҳои Қазоқистон зуд-зуд ташкил мекунанд.

Ярмарка аз 16 то 18-уми октябр давом мекунад ва дар он навъҳои ангур, тарбуз, харбуза, шарбатҳои табиӣ ва дигар навъҳои меваҷот ба фурӯш гузошта хоҳад шуд.

Намояндагони Тоҷикистон гуфтаанд, ки Павлодар аввалин нуқтаи ташкили ярмарка аст ва ният доранд, дар минтақаҳои Караганда, Остона, Кокшетау низ чунин иқдомро ба роҳ монанд.

 “Мо ҳангоми фурӯш танҳо хароҷоти боркашониро илова мекунем. Ҳафтаи оянда ният дорем, ки лимӯ, хурмо, анору себ биёрем. Мо инчунин, бозорҳои Павлодарро гашта, маълум мекунем, ки ба кадом молҳо эҳтиёҷ доранд. Мардум аз мо мехаранд, аз сифати он қаноатманд ҳастанд ва ба мо ташаккур мегӯянд» - мегӯяд Илҳом Холов, деҳқон аз Тоҷикистон.

Раёсати соҳибкорӣ  ва кишоварзии шаҳри Павлодар ба Казинформ гуфтааст, ки дар аввал ярмарка ҳамчун чорабинии якдафъаина дар назар гирифта шуда буд, вале ба эҳтимоли зиёд он дар оянда ба як чорабинии муқаррарӣ табдил ёбад.

“Дар доираи ҳамкории тиҷоратӣ ва иқтисодии Қазоқистону Тоҷикистон кишоварзон ба вилояти Павлодар барои ташкили савдо бидуни миёнрав даъват шуданд. Мо ин корро ҳар ҳафта ташкил мекунем. Рӯзҳои панҷшанбе, ҷумъа ва шанбе” – гуфтааст, Асел Кенжалина мудири бахши соҳибкорӣ ва кишоварзии шаҳри Павлодар.

Dialog.TJ