Як додраси федералии Иёлоти Муттаҳида ба маъмурияти Доналд Трамп дастур дод, ки дастрасии хабарнигорони се расонаи бузурги амрикоӣ ба Кохи сафедро барқарор кунад.

Додрас Тим Келлӣ аз Додгоҳи ИМА ин қарорро дар парвандаи шикояти се расонаи “Politico”, “CNN” ва “MS NOW (MSNBC) алайҳи ҳукумати Трамп содир кард. Ин расонаҳо ба маҳдудияти дастрасӣ ба Кохи сафед, ки Трамп рӯзи 18-уми сентябр эълон карда буд, эътироз карда буданд.

Бар асоси қарори додгоҳ, ҳукумати ИМА бояд иҷозаи вуруди хабарнигорони ин расонаҳоро фавран барқарор кунад. Ҳамчунин, мақомҳои Кохи сафед барои 14 рӯз ҳаққи иҷрои ин маҳдудиятро надоранд.

Додрас Келлӣ гуфтааст, ки маҳдудияти ҷоришуда эҳтимолан бо ислоҳи аввали Қонуни асосии ИМА, ки озодии баён ва матбуотро ҳифз мекунад, мухолифат дорад. Ба гуфтаи ӯ, ин маҳдудият ҳамчунин, метавонад бо ҳуқуқи бархӯрдорӣ аз раванди қонунии одилона мухолиф бошад.

Додгоҳ ҳамчунин, далели ҳукумати Трампро, ки маҳдудияти дастрасӣ бо масъалаҳои амнияти миллӣ иртибот дорад, қабул накардааст.

Вазорати адлияи ИМА дар мавқеи худ гуфта буд, ки дастрасӣ ба Кохи сафед ҳаққи мутлақ нест, балки имтиёз аст ва раиси ҷумҳур метавонад онро боздорад.

Дар ҳамин ҳол, эътилофе аз созмонҳои ҳомии озодии матбуот ва даҳҳо созмони хабарӣ дар ҳуҷҷати ҳуқуқие, ки ба нафъи се расона пешниҳод карданд, гуфтаанд, ки маҳрум кардани хабарнигорон ва расонаҳо аз дастрасӣ ба далели тарзи инъикоси хабарҳо бо даҳсолаҳо таҷрибаи ҳуқуқии Додгоҳи олии ИМА мухолифат дорад.

Қарори додгоҳ дар ҳоле содир шудааст, ки муносибати маъмурияти Трамп бо расонаҳои хабарӣ дар моҳҳои охир ба яке аз баҳсҳои умдаи ҳуқуқӣ миёни Кохи сафед ва ҷомеаи журналистӣ табдил ёфтааст.

Dialog.tj