Президенти Туркия Раҷаб Тайиб Эрдуғон бо нашри як мақола дар хабаргузории “Блумберг” хостори лағви ҳаққи вето дар Шурои амнияти Созмони Милали Муттаҳид шудааст. Ӯ гуфтааст, низоми кунунии Шурои амният ба воқеиятҳои ҷаҳони муосир мувофиқат намекунад.

Раҷаб Тайиб Эрдуғон гуфтааст, бекор шудани ҳаққи вето бояд дар маркази ислоҳоти Шурои амният қарор гирад. Ӯ афзудааст, буҳронҳои солҳои ахир, аз ҷумла пандемия, буҳронҳои энергетикӣ, халалдор шудани занҷираи таъминот ва низоъҳои минтақавӣ нишон доданд, ки вогузор намудани масъулияти ҳалли мушкилоти ҷаҳонӣ ба шумори маҳдуди пойтахтҳо дигар ба шароити имрӯз мувофиқ нест.

Президенти Туркия гуфт, сохтори кунунии Шурои амният ҳанӯз ҳам муносибатҳои байналмилалии баъди Ҷанги дуюми ҷаҳонро инъикос мекунад. Ба гуфтаи ӯ, фақат зиёд намудани шумори аъзои доимии Шуро мушкили тамаркузи қудратро ҳал намекунад ва метавонад имтиёзҳои низоми мавҷудро бештар намояд.

Ҳамчунин, Раҷаб Тайиб Эрдуғон пешниҳод намуд, ки мақоми узвияти доимӣ дар Шурои амният барҳам дода шавад. Ба гуфтаи ӯ, ҳамаи аъзои Шуро бояд аз ҷониби Маҷмаи Умумии СММ барои муҳлатҳои муайян интихоб шаванд. Ӯ гуфт, кишварҳое, ки мехоҳанд дубора узи Шурои амният шаванд, бояд ба воситаи интихобот ва бо дастгирии аксарияти кишваҳои узви Созмони Милали Муттаҳид ба ин мақом даст ёбанд.

Dialog.tj