Дар Осорхонаи миллӣ рӯнамоии китоби тозанашри “Коллексияи Пешвои миллат дар Осорхонаи миллӣ” баргузор гардид.

Бинобар иттилои маркази матбуоти Вазорати фарҳанги Ҷумҳурии Тоҷикистон, китоби мазкур аз ҷониби мутахассисони Осорхонаи миллии Тоҷикистон дар заминаи коллексияи нодири ашёи таърихию фарҳангие таҳия гардидааст, ки дар солҳои гуногун аз ҷониби Президенти Ҷумҳурии Тоҷикистон муҳтарам Эмомалӣ Раҳмон ба Осорхонаи миллӣ эҳдо шудаанд.

“Мазмуни китоб фарогири осори арзишманди дорои аҳамияти баланди таърихию фарҳангӣ буда, намунаҳои нодири бозёфтҳои бостоншиносӣ, маводи сиккашиносӣ, шоҳкориҳои санъати тасвирию амалӣ, созҳои мусиқӣ ва дигар нигораҳои бебаҳои таърихиро дар бар мегирад”, - навиштааст манбаъ.

Гуфта мешавад, ки китоби “Коллексияи Пешвои миллат дар Осорхонаи миллӣ” на танҳо як феҳристи мукаммали осори гаронарзиш аст, балки саҳифаи заррине аз таърихи навин, дипломатия, фарҳанг ва сиёсати созандаи давлатдории миллии тоҷиконро ба ҷомеа муаррифӣ месозад.

Dialog.tj