Бинобар иттилои Федератсияи футболи Тоҷикистон, ситоди мураббиёни мунтахаби Тоҷикистон бо роҳбарии Игор Ангеловский ҳайати дастаро барои бозиҳои дӯстонаи моҳҳои сентябр ва октябр эълон кард.

Бояд гуфт, ки тими миллии Тоҷикистон моҳҳои сентябр ва октябр се бозии дӯстона баргузор мекунад. 23-уми сентябр дар шаҳри Боку бо мунтахаби Озарбойҷон, сипас, дар шаҳри Чунтсини Чин 28-уми сентябр бо мунтахаби Фаластин ва 6-уми октябр бо тими миллии Чин бозӣ мекунад.

Манбаъ навиштааст, ки ба ҳайати мунтахаби Тоҷикистон 28 бозигар шомил шудаанд, аз ҷумла 3 дарвозабон, 10 ҳимоятгар, 10 нимҳимоятгар ва 5 ҳамлагар.

Гуфта мешавад, ки мунтахаби кишвар 18-уми сентябр дар Маркази техникии Федератсияи футболи Тоҷикистон воқеъ дар Варзоб омадагиро оғоз кард.

Сармураббии тими миллии Тоҷикистон Игор Ангеловский қайд кардааст, ки бозӣ бо мунтахабҳои Озарбойҷон, Фаластин ва Чин осон нахоҳанд буд, зеро рақибони пурқувватанд.

“Ҳар се бозиро мо дар меҳмонӣ баргузор мекунем, ки ин барои қобилияти даста дар мутобиқ шудан ба шароити мураккабтар, инчунин, парвозҳо ва сафарҳои тӯлонӣ, санҷиши ҷиддӣ хоҳад буд. Ман аз футболбозон омодагии комил, интизом ва тамаркузи баландро дар майдон талаб мекунам, зеро танҳо бо чунин муносибат мо метавонем пеш аз Ҷоми Осиё-2027, ки моҳи январ баргузор мешавад, ба саволҳои зарурӣ ҷавоб пайдо кунем”, - гуфтааст ӯ.

Dialog.tj