Ҷумҳурии Тоҷикистон ва Ҷумҳурии Беларусия бо имзои як тавофуқномаи нав мехоҳанд ҳамкориҳои худ дар мубориза бо коррупсияро густариш диҳанд.

Дар шаҳри Мински Ҷумҳурии Беларусия Султонзода Сулаймон Саид, директори Агентии назорати давлатии молиявӣ ва мубориза бо коррупсияи Ҷумҳурии Тоҷикистон ва Дмитрий Гора, прокурори генералии Беларусия Барномаи ҳамкорӣ барои солҳои 2027-2028-ро, ки ҳадафаш мубориза бо коррупсия аст, ба имзо расонданд.

Ин санади нав рӯзи 16-уми сентябр дар ҷараёни мулоқоти ҳайати расмии Агентии назорати давлатии молиявӣ ва мубориза бо коррупсияи Ҷумҳурии Тоҷикистон ва ҳайати Прокуратураи генералии Ҷумҳурии Беларусия ба имзо расид.

Тибқи иттилоъ, ҳайати Ҷумҳурии Тоҷикистонро генерал-полковники адлия Султонзода Сулаймон Саид роҳбарӣ менамуд. Ҳадафи асосии сафар ширкат дар нишасти навбатии Шурои байнидавлатии муқовимат бо коррупсия буд.

Дар ҷараёни ин сафар ҳайати Тоҷикистон бо прокурори генералии Беларусия ҳамчунин, масоили ҳамкориҳои дуҷонибаро мавриди баррасӣ қарор доданд.

Ҳар ду ҷониб дар бораи густариши ҳамкорӣ барои ошкор намудан ва тафтиши ҷиноятҳои коррупсионӣ, табодули иттилоот ва таҷриби корӣ, ҳамчунин, доир кардани чорабиниҳои муштарак гуфтугӯ карданд.

Натиҷаи асосии мулоқоти ҳайати Тоҷикистон бо ҳайати Беларусия имзои санади “Барномаи ҳамкорӣ дар самти муқовимат бо коррупсия барои солҳои 2027 -2028” буд.

Dialog.tj