Вазорати молияи Ҷумҳурии Тоҷикистон ва Бонки аврупоии таҷдид ва рушд барои густариши ҳамкориҳои самроягузорӣ дар солҳои 2026-2030 санади нави ҳамкорӣ имзо намуданд.

Тибқи иттилоъ, Вазорати молияи Ҷумҳурии Тоҷикистон ва Бонки аврупоии таҷдид ва рушд тавофуқномаи ҳамдигарфаҳмӣ дар хусуси харитаи роҳи стратегии сармоягузориҳои бисёрсоларо имзо намуданд, ки он заминаи ҳамкориҳои дуҷонибаро фароҳам мекунад.

Вазорати молияи Тоҷикистон иттилоъ медиҳад, ки тавофуқномаи зикршуда самтҳои асосии ҳамкорӣ миёни Тоҷикистон ва Бонки аврупоии таҷдид ва рушд барои чор соли ояндаро муайян мекунад.

Дар тавофуқномаи зикршуда яке аз бахшҳои асосӣ ҳамкорӣ дар соҳаи энергетика мебошад. Ду ҷониб ният доранд барои рушди манбаъҳои барқаршавандаи энергия ва коҳиш додани талафоти  неруи барқ ҳамкорӣ кунанд.

Ҳамчунин, масъалаҳои рушди низоми обёрӣ, беҳтар кардани идоракунии иқтисодӣ, баланд бардоштани самаранокии корхонаҳои давлатӣ низ ба нақшаи ҳамкориҳои дуҷониба ворид карда шуданд.

Ҷалби сармояи хусусӣ, беҳтар кардани робитаҳои нақлиётӣ, бунёди муассисаҳои таълимӣ  ва рушди рақамикунонӣ аз самтҳои асосии ҳамкориҳои дуҷонибаи тавофуқномаи имзошуда мебошанд.

Тавофуқномаи имзошуда ҳамкориҳои дуҷониба дар самтҳои зикршударо аз соли 2026 то соли 2030 фаро мегирад.

Бонки аврупоии таҷдид ва рушд яке аз шарикони асосии байналмилалии Тоҷикистон дар бахши сармоягузорӣ ба шумор меравад. Ҳамкориҳои Тоҷикистон бо ин бонк асосан дар самтҳои энергетика, нақлиёт, инфрасохтор, рушди бахши хусусӣ ва ислоҳоти иқтисодӣ ҷараён дорад.

Dialog.tj