Дар шаҳри Тулаи Федератсияи Русия ба муносибати 880-солагии ин шаҳр имкониятҳои сайёҳӣ ва ҳунарҳои мардумии Тоҷикистон муаррифӣ шуд.

Намоиши имкониятҳои сайёҳӣ ва ҳунарҳои мардумии Тоҷикистон рӯзҳои 12-13-уми сентябр дар фестивали “Фанфарҳои Тулаи Кремл” баргузор шуд. Дар ин намоиш либосҳои миллӣ, сӯзанӣ, чакан ва дигар намунаҳои ҳунарҳои мардумии Тоҷикистон муаррифӣ шуд.

Намоиши имкониятҳои сайёҳӣ ва ҳунарҳои мардумии Тоҷикистон бо пуштибонии Сафорати Тоҷикистон дар Русия ва созмони ҷамъиятии “Маркази фарҳангии тоҷикон” баргузор гардид. Дар ин намоиш намояндагони ҷамъиятҳои фарҳангии тоҷикон дар Тула низ ширкат намуданд.

Дар ин намоиш дар баробари ҳунарҳои мардумӣ, маҳсулоти аз сангу чӯб таҳияшуда ва маводҳои иттилоотӣ дар хусуси имкониятҳои сайёҳии Тоҷикистон пешниҳод гардид.

Онҳое, ки дар ин фестивал ширкат намуданд, ба либосҳо миллӣ, нақшу нигори анъанавӣ ва санъати сӯзандӯзӣ таваҷҷуҳи махсус зоҳир намудаанд. Масъулони чорабинӣ таъкид намуданд, ки ҳадафи ин гуна чорабиниҳо ҳифз ва муаррифии арзишҳои фарҳангии миллӣ ва дастгирии ҳунармандони мардумӣ аст.

Масъулони ин чорабинӣ мегӯянд, ки баргузории чунин намоишгоҳҳо метавонанд барои ҷалби бештари сайёҳони рус ба Тоҷикистон ва шинос намудани онҳо ба минтақаҳои сайёҳии кишвар мусоидат кунанд.

Dialog.tj