Кореяи Шимолӣ бо эълони анҷоми як размоиши низомӣ, ки артиллерия ва неруҳои мушакиро дар бар мегирифт, гуфтааст, партоби мушакҳо бахше аз размоиши тирпарронӣ бо муҳимоти ҷангӣ будааст.

“Ройтерз” рӯзи душанбе, 14-уми сентябр, гузориш додааст, ки ин размоиш рӯзи шанбе ва пас аз размоиши муштараки панҷрӯзаи миёни Кореяи Ҷанубӣ, Амрико ва Ҷопон, ки рӯзи ҷумъа ба поён расид, анҷом шудааст.

Бар асоси гузориш, ин хабар аз ҷониби хабаргузории расмии Кореяи Шимолӣ (KCNA) нашр шудааст.

Ба гуфтаи хабаргузории расмии Кореяи Шимолӣ, “размоиши муштараки ҳамла бо қудрати оташ” панҷ воҳиди артишро дар бар мегирифт ва дар ҷараёни он чандин низоми таслиҳотӣ, аз ҷумла паҳподҳои ҳамлагар, мушакҳои крузии тактикӣ, мушакҳои баллистикии тактикӣ ва мушакандозҳои чандгонаи калибри баланд мавриди озмоиш қарор гирифтанд.

Ин дар ҳолест, ки расонаҳои давлатии Кореяи Шимолӣ қаблан дар бораи чандин озмоиши мушакии ахир, ки аз ҷониби Кореяи Ҷанубӣ гузориш шуда буд, хомӯшӣ ихтиёр карда буданд.

Dialog.tj