Мақомоти Тоҷикистон ва як ширкати чинӣ масъалаи таъсиси Маркази миллии ҷамъоварии маълумоти моҳвораӣ дар заминро баррасӣ кардаанд.

Масъалаи таъсиси маркази ҷамъоварии маълумоти моҳвораӣ дар замин дар мулоқоти Исфандиёри Саъдулло, сардори Хадамоти алоқаи назди Ҳукумати Ҷумҳурии Тоҷикистон бо Чжао Чунчао, муовини роҳбари ширкати “Great Wall Industry Corporation” (CGWIC) баррасӣ шуд.

Тибқи иттилои Хадамоти алоқаи Тоҷикистон, ин мулоқот дар шаҳри Душанбе сурат гирифт. Ҳар ду ҷониб зикр намуданд, ки марказ метавонад барои назорати пиряхҳо, захираҳои обӣ ва пешгирии офатҳои табиӣ истифода шавад.

Хадамоти алоқаи Тоҷикистон хабар медиҳад, ки дар мулоқот имкониятҳои густариши ҳамкорӣ дар бахши технологияҳои кайҳонӣ ва истифодаи иттилооти моҳвораӣ баррасӣ шудаанд.

Мақомоти тоҷик мегӯянд, ки чунин марказ метавонад барои ҷамъоварӣ ва таҳлили маълумоти вобаста ба тағйироти муҳити зист истифода шавад. Маркази ҷамъоварии маълумоти моҳвораӣ дар замин имконият медиҳад, ки вазъияти пиряхҳо ва захираҳои обӣ бештар назорат ва ҳамчунин, хатари баъзе офатҳои табиӣ саривақт муайян шавад.

Dialog.tj