Эҳсон Сафарзода, номзади илмҳои филология ва сармуҳаррири рӯзномаи “Омӯзгор” бо нашри мақолаи “Меъмори сулҳ” масъалаи пешниҳоди Президенти Ҷумҳурии Тоҷикистон Эмомалӣ Раҳмон ба ҷоизаи сулҳи Нобелро матраҳ намуда, таҷрибаи сулҳофарии Тоҷикистон ва ташаббусҳои байналмилалии кишварро аз омилҳои асосии чунин пешниҳод донистааст.

Мақолаи ӯ ба унвони “Меъмори сулҳ” дар сомонаи Вазорати маориф ва илми Тоҷикистон нашр шуд. Эҳсон Сафарзода дар мақола аз анҷоми ҷанги шаҳрвандӣ ва имзои Созишномаи умумии истиқрори сулҳ ва ризояти миллӣ дар соли 1997, ҳамчунин, аз ташаббусҳои Тоҷикистон дар масъалаҳои об, иқлим, ҳифзи пиряхҳо ва таҳкими сулҳ ёд намудааст.

Дар мақолаи зикршуда Эҳсон Сафарзода таъкид намудааст, ки таҷрибаи Тоҷикистон дар гузариш аз низоми дохилӣ ба сулҳ метавонад аҳамияти байналмилалӣ дошта бошад. Ӯ ҳамчунин, таъкид мекунад, ки пешниҳоди Эмомалӣ Раҳмон ба ҷоиза метавонад ба муаррифии таҷрибаи сулҳофарии Тоҷикистон дар сатҳи байналмилалӣ мусоидат кунад.

Дар ин мақола гуфта мешавад, ки тасмим дар хусуси додани Ҷоизаи сулҳи Нобел фақат дар салоҳияти Кумитаи Нобели Норвегия аст.

Ин мақола дар ҳоле нашр мешавад, ки Тоҷикистон бо сарварии Эмомалӣ Раҳмон талошҳои худро барои пешбурди ташаббусҳои байналмилалӣ дар масъалаҳои сулҳ, об ва тағйирёбии иқлим бештар мекунад.

Dialog.tj