Бо ташаббуси Агентии инноватсия ва технологияҳои рақамии назди Президенти Ҷумҳурии Тоҷикистон дар Боғи «Куруши Кабир»-и шаҳри Душанбе фестивали кушоди зеҳни сунъӣ, инноватсия ва технологияҳои рақамӣ таҳти унвони «AI ALLEY» («Хиёбони зеҳни сунъӣ») баргузор гардид.

Тавре ки маркази матбуоти Агентии инноватсия ва технологияҳои рақамии назди Президенти Ҷумҳурии Тоҷикистон хабар медиҳад, ҳадафи фестивал муаррифии имкониятҳои амалии зеҳни сунъӣ, рушди фарҳанги рақамӣ ва таҳкими ҳамкории давлат, бахши хусусӣ ва экосистемаи стартапӣ мебошад.

Гуфта мешавад, ки дар фестивал роҳбарияти Агентӣ, намояндагони як қатор вазорату идораҳо ва шарикони рушд иштирок намуда, вобаста ба аҳамияти қабули Қатъномаи Маҷмаи Умумии Созмони Милали Муттаҳид бо ташаббуси Ҷумҳурии Тоҷикистон оид ба эълон намудани 31-уми август ҳамчун Рӯзи байналмилалии зеҳни сунъии бехатар, ҳифзшуда ва боэътимод андеша ва мавқеи худро баён намуданд.

“Дар чаҳор минтақаи асосии фестивал саҳнаи асосӣ, минтақаи намоишӣ, минтақаи омӯзишӣ ва минтақаи фароғатӣ – ширкатҳои технологӣ, стартапҳо, муассисаҳои таълимӣ, барномасозон ва ҷавонон маҳсулот, хизматрасониҳо ва имкониятҳои инноватсионии худро муаррифӣ намуда, дар доираи барномаи фестивал лоиҳаҳои рақамӣ, мастер-классҳо, машғулиятҳои амалӣ ва барномаҳои интерактивиро пешниҳод намуданд”, - навиштааст манбаъ.

Dialog.tj