Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон зикр намуданд, ки вилояти Хатлон ба яке аз такягоҳҳои асосии энергетикии кишвар табдил ёфта, беш аз 75 фоизи неруи барқи кишвар дар ин минтақа истеҳсол мешавад.

Сарвари давлат дар ҷараёни сафари корӣ ба вилояти Хатлон, ки рӯзи 4-уми сентябр сурат гирифта буд, бо намояндагони ин вилоят мулоқот намуда, таъкид карданд, ки  ин вилоят дар рушди иқтисодии кишвар нақши муҳим дорад.

Сарвари кишвар зикр намуданд, ки дар солҳои истиқлол дар Хатлон як қатор иншоотҳои муҳимми энергетикӣ, аз ҷумла “Сангтӯда-1”, “Сангтӯда-2”, хати интиқоли барқи “Лолазор Хатлон” ва “Тоҷикистон-Афғонистон” бунёд ва ба истифода дода шуд.

Пешвои миллат Эмомалӣ Раҳмон гуфтанд, ки иқтидори умумии истеҳсоли неруи барқ дар Тоҷикистон 6,4 ҳазор мегавваттро ташкил медиҳад ва ҳиссаи Хатлон дар истеҳсоли он аз 75 фоиз бештар аст.

Сарвари кишвар ҳамчунин, Хатлонро яке аз марказҳои муҳимми иқтисодии Тоҷикистон номида, таъкид карданд, ки вилоят дар рушди саноат, соҳибкорӣ, энергетика ва таъмини амнияти озуқавории кишвар нақши муҳим дорад.

Дар давраи истиқлол шумораи корхонаҳои саноатӣ дар вилоят аз 75 ба беш аз 900 адад расидааст. Дар ин корхонаҳо садҳо навъи маҳсулот истеҳсол мешавад.

Дар Хатлон беш аз 100 лоиҳаи давлатии сармоягузорӣ бо маблағи умумии 16 миллиард сомонӣ амалӣ шудааст.

Таъкид шуд, ки вилояти Хатлон дар соҳаи кишоварзӣ низ саҳми назаррас дорад. Бар асоси иттилои ироашуда, беш аз 53 фоизи ҳаҷми умумии маҳсулоти кишоварзии Тоҷикистон дар Хатлон истеҳсол мешавад. Минтақа дар истеҳсоли пахта, ғалладона, сабзавот, полезӣ ва мева низ аз минтақаҳои пешсафи кишвар ба шумор меравад.

Пешвои миллат таъкид намуданд, ки Хатлон аз нигоҳи таърихӣ низ барои давлатдории тоҷикон аҳамияти хос дорад ва дар рушди фарҳангиву иҷтимоии кишвар нақши муҳим мебозад.

Зикр шуд, ки ба муносибати 35-солагии Истиқлоли Тоҷикистон дар вилояти Хатлон 8 ҳазору 300 иншоот ба истифода дода шуд ва дар соли ҷорӣ 85 ҳазор ҷойҳои корӣ дар ин вилоят таъсис дода шуд.

Dialog.tj