Федератсияи Русия ба як мактаб-интернати Ҷумҳурии Тоҷикистон беш аз 550 китоб тақдим кардааст. Китобҳои тақдимшуда барои ғанӣ кардани китобхонаи муассиса ва фароҳам кардани имконияти бештари хонандагон барои истифода аз адабиёти таълимӣ ва бадеӣ ирсол гардидааст.

Намояндагии “Россотрудничество” дар Тоҷикистон, ба воситаи “Русский дом” дар шаҳри Душанбе китобҳоро ба мактаб-интернати рақами 5 барои кӯдакони имконияташон маҳдуд супоридааст.

Тибқи иттилоъ дар миёни китобҳои тақсимшуда, маводҳои таълимӣ оид ба забони русӣ, рушди нутқ ва санъати тасвирӣ, ҳамчунин, адабиёти бадеӣ ҷой дода шудааст. Қисме аз китобҳо ба таърихи Ҷанги Бузурги Ватанӣ бахшида шудаанд.

Бар асоси иттилои намояндагони «Россотрудничество» иқдоми мазкур дар доираи барномаи давлатии Русия оид ба мусоидат ба рушди байналмилалӣ ва лоиҳаи «Россия с вами» амалӣ шудааст.

Андрей Патрушев, роҳбари намояндагии “Россотрудничество” дар Тоҷикистон гуфт, ки китобҳои тақдимшуда метавонанд барои хонандагон дар омӯзиши забони русӣ ва шиносоӣ бо осори классикии адабиёти рус кумак кунанд.

Қаблан низ аз ҷониби Русия ба мактаб ва китобхонаҳои кишвар, дар маҷмуъ беш аз 15 ҳазор нусха китобҳои таълимӣ ва бадеӣ супорида шудаанд.

Ҳамчунин, дар рӯзи аввали хониш “Русский дом” ба мактаб-интернати махсуси кӯдакони ношунво ва камшунавои ба номи Тухтабой Ғаффоров дар вилояти Суғд низ як миқдор китоб тақдим намудааст.

Ин барнома бахше аз ҳамкориҳои гуманитарии Русия ва Тоҷикистон ба шумор меравад, ки аз ҷумла ба густариши омӯзиши забони русӣ ва дастрасии хонандагон ба адабиёти таълимӣ ва фарҳангӣ равона шудаанд.

Dialog.tj