2-юми сентябр Маҷмаи Умумии Созмони Милали Муттаҳид қатъномаро таҳти унвони «Ҷузъиёти баргузории Конфронси СММ оид ба арзёбии фарогири ниҳоии татбиқи ҳадафҳои Даҳсолаи байналмилалии амал “Об барои рушди устувор”, 2018–2028» бо иттифоқи оро қабул намуд.

Маркази матбуоти Вазорати корҳои хориҷии Тоҷикистон хабар медиҳад, ки Маҷмаи Умумии СММ ба ин васила тартиби баргузории Конфронси оби СММ – 2028-ро, ки дар Душанбе рӯзҳои 4-6 майи 2028 баргузор мегардад, расман тасдиқ кард.

"Қабули қатъномаи мазкур марҳилаи муҳимро дар раванди омодагӣ ба баргузории Конфронси оби СММ – 2028 ташкил дода, он ҳамчун иқдоми калидӣ дар ташаккули марҳилаи минбаъдаи ҳамкории байналмилалӣ дар соҳаи об дар арафаи анҷомёбиии Даҳсолаи байналмилалӣ ба ҳисоб меравад", - навиштааст манбаъ.

Гуфта мешавад, ки Конфронси оби СММ – 2028 дар Душанбе метавонад на танҳо марҳилаи ҷамъбастии Даҳсолаи байналмилалӣ, балки масири наве ба сӯи ҳамкории ҷаҳонӣ дар соҳаи об бошад. Ин ҳамоиши муҳим бо такя ба таҷриба ва сабақҳои Даҳсолаи байналмилалии об метавонад ба ташаккули заминаи муштарак ҷиҳати идомаи амалҳо дар соҳаи об мусоидат намуда, ба чолишҳои кунунӣ ва ояндаи соҳаи об посухгӯ бошад.

Dialog.tj