Расонаҳои Украина субҳи сешанбе аз шунида шудани чандин таркиши шадид дар пойтахти ин кишвар хабар доданд.

Бино ба гузоришҳо, аз пойгоҳи баҳрии Новороссийск ҳашт мушаки болдори «Калибр» ва ҳамзамон чандин мушаки баллистикии «Искандер-М» ва чанд мушаки баландсуръати «Сиркон» ба самти Киев партоб шудаанд.

Ба навиштаи хабаргузории «Спутник», чанде пеш аз ин Вазорати табдили рақамии Украина дар Киев ҳушдори ҳамлаи ҳавоӣ ва вазъияти изтирорӣ эълом карда буд.

Манобеи маҳаллӣ чанд дақиқа баъд тахмин заданд, ки дар маҷмуъ дастикам 20 мушаки баллистикии «Искандер-М», 8 мушаки болдори «Калибр» ва 4 мушаки «Сиркон» партоб шудаанд. Ба гуфтаи ин манобеъ, аксари мушакҳо ба Киев расидаанд.

Бар асоси ин гузоришҳо, системаҳои дифои ҳавоии амрикоии «Патриот» танҳо тавонистаанд теъдоди ками ин мушакҳоро боздоранд.

Дар бораи хисорот ва талафоти эҳтимолии ҷонӣ то замони интишори ин хабар маълумоти дақиқе пешниҳод нашудааст.

Dialog.tj