Раёсати Вазорати корҳои дохилӣ дар шаҳри Душанбе аз боздошти фолбине хабар дод.

Манбаъ навиштааст, ки зимни машғул шудан ба фолбинӣ ва сеҳру ҷоду, кормандони Шуъбачаи шаҳрии милитсияи ШВКД-1 дар ноҳияи Шоҳмансур шаҳрванд Ҳабибахон Атаназарова, сокини 64-солаи шаҳри Душанберо дастгир намуданд.

Гуфта мешавад, ки номбурда муддатест дар манзили истиқоматиаш шаҳрвандонро қабул намуда, барои иҷрои амалҳои фолбинӣ аз орд, равғани гӯсфанд, хоки хонаи кӯрмуш, сӯзан, нони гарм, либос, тухми мурғ ва қанди сафед истифода бурда, бо ин роҳ манфиати молиявӣ ба даст меовардааст.

Зикр мегардад, ки вобаста ба ҳолати мазкур нисбат ба номбурда бо моддаи 482 КҲМ Ҷумҳурии Тоҷикистон протоколи маъмурӣ тартиб дода шуда, бо қарори суд ҷаримаи маъмурӣ татбиқ гардид.

Dialog.tj