Нурализода Амрулло, директори кулли Палатаи савдо ва саноати вилояти Хатлон мегӯяд, ин ниҳод дар 35 соли даврони истиқлол барои пайвастани соҳибкорони минтақа ба бозорҳои байналмилалӣ, ҷалби шарикони хориҷӣ ва рушди содирот фаъолият кардааст. Нурализода Амрулло таъкид мекунад, ки Палатаи савдо ва саноати вилояти Хатлон дар ин муддат бо 102 палата ва сохтори тиҷоратии хориҷӣ созишномаҳои ҳамкорӣ баста.

Палатаи савдо ва саноати вилояти Хатлон дар сеюним даҳсолаи охир яке аз ниҳодҳои асосии миёнарав байни соҳибкорони минтақа ва шарикони хориҷӣ будааст. Тибқи маълумоти пешниҳодкардаи роҳбарияти Палата, дар давоми 35 соли истиқлол 984 мулоқот бо намояндагони палатаҳои савдо ва саноати кишварҳои хориҷӣ ва корпусҳои дипломатӣ баргузор шудааст.

Дар ҳамин давра 36 форуми соҳибкорӣ, 424 мизи мудаввар, семинар ва тренинг ва 30 намоишгоҳ баргузор ё ташкил карда шудааст.

Палата, инчунин, мегӯяд, ки барои соҳибкорони Хатлон 1624 пешниҳоди тиҷоратӣ аз ширкатҳои хориҷӣ дастрас карда, иштироки 1250 соҳибкорро дар вохӯриҳои мустақими B2B дар дохил ва хориҷи кишвар таъмин кардааст.

Аз бюрои хурд то ниҳоди дастгирии соҳибкорӣ

Таърихи сохтори Палата дар вилояти Хатлон ба соли 1977 бармегардад. Он замон он ҳамчун Бюрои экспертизаи мол дар вилояти собиқ Қӯрғонтеппа фаъолият мекард ва ҳамагӣ се корманд дошт.

Аз моҳи марти соли 1978 сохтор ба намояндагии Палатаи савдо ва саноати Ҷумҳурии Тоҷикистон дар вилояти Хатлон табдил ёфт.

Аммо марҳилаи нави фаъолияти он баъди гузаштани Тоҷикистон ба иқтисоди бозорӣ оғоз шуд. 26-уми декабри соли 1997 Палатаи савдо ва саноати вилояти Хатлон таъсис дода шуд.

Аз он вақт ба ин сӯ, дастгирии соҳибкорон, рушди робитаҳои иқтисодии хориҷӣ, ҷалби сармоя ва мусоидат ба содироти маҳсулоти маҳаллӣ аз самтҳои асосии фаъолияти он номбар мешаванд.

Робита бо беш аз 100 сохтори хориҷӣ

Ба гуфтаи Палата, он имрӯз бо зиёда аз 102 палата ва сохтори тиҷоратии кишварҳои хориҷӣ ҳамкорӣ дорад.

Дар миёни шарикон сохторҳои тиҷоратии Русия, Қазоқистон, Қирғизистон, Беларус, Украина, Ӯзбекистон, Афғонистон, Эрон ва Туркия номбар мешаванд.

Палата мегӯяд, ки ин робитаҳо барои пайдо кардани шарикони нав, мубодилаи таҷриба, ҷалби сармоя ва васеъ кардани имкониятҳои содиротии соҳибкорони Хатлон истифода мешаванд.

Соҳибкорони вилоят дар намоишгоҳҳо ва чорабиниҳои тиҷоратӣ дар Қазоқистон, Туркия, Амороти Муттаҳидаи Араб, Ӯзбекистон, Эрон, Чин ва дигар кишварҳо иштирок кардаанд.

Кӯшиш барои баровардани маҳсулоти Хатлон ба бозорҳои нав

Яке аз самтҳои нави фаъолияти Палата мусоидат ба фурӯши маҳсулоти кишоварзӣ ва саноатии вилоят дар бозорҳои дохилӣ ва хориҷӣ мебошад.

Дар ҳамин замина, бо пешниҳоди Палата ва дастгирии мақомоти иҷроияи ҳокимияти давлатии вилояти Хатлон платформаи «Агромаркет Хатлон TJ» ба фаъолият оғоз мекунад.

Ҳадафи он фароҳам кардани имкониятҳои бештар барои фурӯши маҳсулоти истеҳсолкунандагони маҳаллӣ ва рушди содирот гуфта мешавад.

Палата ҳамчунин, бо ҶСП «Фридом Бонки Тоҷикистон» ёддошти тафоҳум ба имзо расондааст. Дар доираи ин ҳамкорӣ истифодаи платформаи «Агромаркет»-и ин бонк барои ба бозор баровардани маҳсулоти кишоварзӣ ва саноатии соҳибкорони Хатлон пешбинӣ шудааст.

«ТОП-35» ва соҳибкорони Хатлон

Дар солҳои охир Палата дар баргузории як қатор форумҳо ва намоишгоҳҳои минтақавӣ низ иштирок кардааст.

Аз ҷумла, дар форумҳои «Бохтар Фуд» ва «Хатлон Инвест» солҳои 2022–2025, инчунин, намоишгоҳҳои маҳсулоти Хатлон дар шаҳри Алмаато дар солҳои 2024–2026 соҳибкорони вилоят иштирок кардаанд.

Дар озмуни «ТОП-35 шарики боэътимод», ки бори аввал бо дастгирии Ҳукумати Тоҷикистон ва ташаббуси Палатаи савдо ва саноати Ҷумҳурии Тоҷикистон баргузор шуд, аз вилояти Хатлон 25 ширкату корхона ва соҳибкор иштирок карданд.

Тибқи маълумоти Палата, шаш ширкат соҳиби ҷоиза шуда, 19 ширкату соҳибкори дигар сертификати «Шарики боэътимоди сол» гирифтаанд.

408 аъзои Палата...

Ҳоло 408 ширкату корхона, хоҷагии деҳқонӣ ва соҳибкори инфиродӣ аз вилояти Хатлон аъзои Палатаи савдо ва саноати Ҷумҳурии Тоҷикистон мебошанд.

Роҳбарияти Палата густариши аъзогӣ, пайдо кардани бозорҳои нави содиротӣ, ҷалби технология ва сармояи хориҷӣ ва таҳкими робитаҳои мустақими соҳибкоронро аз самтҳои муҳимми фаъолияти минбаъда медонад.

Нурализода Амрулло мегӯяд, ки Палата минбаъд низ бояд барои муаррифии маҳсулоти Тоҷикистон дар бозорҳои байналмилалӣ ва баланд бардоштани иқтидори содиротии кишвар истифодаи бештари имкониятҳоро таъмин кунад.

Тибқи гуфтаи ӯ, рушди Палата дар 35 соли Истиқлол аз як сохтори хурд ба ниҳоде расидааст, ки имрӯз ҳамчун пайвандгари соҳибкорони Хатлон бо шарикони тиҷоратии хориҷӣ фаъолият мекунад.

Dialog.tj