Масъуд Пизишкиён, раиси ҷумҳури Эрон мегӯяд, ки Теҳрон ба фишорҳои иқтисодии Аммрико муқовимат хоҳад кард. Ӯ гуфт, Амрико дар ҷанги гузашта ба ҳадафҳои қаблии худ нарасид ва фишори иқтисодӣ низ натиҷаи дилхоҳ нахоҳад дод.

Масъуд Пизишкиён рӯзи сешанбе дар ҷаласае дар Бонки марказии Эрон вазъи иқтисодии кишвар ва роҳҳои муқовимат ба фишорҳои нави Амрикоро баррасӣ намуд.

Дар мулоқот раиси Бонки марказии Эрон ва як гурӯҳ иқтисоддонҳои донишгоҳӣ ширкат доштанд. Онҳо вазъи асъор, ҳаҷми пардохти пулӣ, тавозуни пардохтҳои байналмилалӣ ва сиёсати пулию қарзиро муҳокима намуданд.

Масъуд Пизишкиён гуфт, дар шароити фишори хориҷӣ ва маҳдудиятҳои иқтисодӣ нигоҳ доштани субот дар бозорҳои калидӣ, бахусус бозори асъор ва пул ҳамоҳангӣ миёни ҳукумат ва ниҳодҳои иқтисодиро талаб мекунад. Ӯ ҳамчунин, ба зарурати назорати таваррум ва идомаи чораҳо барои нигоҳ доштани суботи иқтисодӣ таъкид намуд.

Раиси ҷумҳури Эрон аз иқтисоддонҳо хост, пешниҳоди худро барои коҳиш додани таъсири маҳдудиятҳои тиҷоратӣ ва идора намудани вазъи нави иқтисодӣ пешниҳод кунанд. Ба гуфтаи ӯ, истифода аз таҷриба ва донишҳои мутахассисони донишгоҳӣ метавонад дар қабули қарорҳои иқтисодӣ нақши муҳим дошта бошад.

Дар ҷаласа ҳамчунин, масъалаҳои сиёсати буҷетӣ, идоракунии корхонаҳо, тиҷорати хориҷӣ ва муносибатҳои иқтисодӣ бо дигар кишварҳо баррасӣ шуданд.

Масъуд Пизишкиён таъкид намуд, ҳукумати ӯ ҷонибдори ҳалли масъалаҳо ба воситаи гуфтугуву музокира аст, вале ҳамзамон омодааст дар баробари фишорҳои иқтисодӣ муқовимат намояд.

“Мо ҷонибдори тафоҳум ва ҳалли масъалаҳо ба воситаи ҳамкорӣ ва музокира ҳастам, вале дар баробари фишорҳои иқтисодӣ, ҳамон тавр, ки то имрӯз истодагарӣ кардем, минбаъд низ муқовимат хоҳем кард”- таъкид кард Масъуд Пизишкиён.

Масъуд Пизишкиён афзуд, ки Амрико дар ҷараёни ҷанг бо вуҷуди амалиёти неруҳои мусаллаҳ ва пуштибонии мардум натавонист ба ҳадафҳои худ расад.

Теҳрон бовар дорад фишори иқтисодӣ низ Вашингтонро ба натиҷаи дилхоҳ нахоҳад расонд.

Dialog.tj