Додгоҳи Маскав ду шаҳрванди Тоҷикистонро, ки дар маркази савдои “Садовод” бо либоси занона гаштаанд, ба 10 шабонарӯз ҳабси маъмурӣ ва ихроҷ аз Русия маҳкум кардааст. Мақомоти Русия ин ду нафарро дар вайрон кардани моддаи 6.21-и Кодекси ҳуқуқвайронкунии маъмурии Федератсияи Русия айбдор кардаанд.

Ба гуфтаи хадамоти муштараки матбуотии додгоҳҳои пойтахти Русия, ду шаҳрванди Тоҷикистон рӯзи 18-уми август дар ҳудуди Маҷмааи савдои «Садовод» бо либоси занона ҳузур доштаанд.

Мақомоти Русия иддао кардаанд, ки онҳо либоси худро ошкоро намоиш дода, амалҳоеро анҷом додаанд, ки аз ҷониби мақомоти Русия ҳамчун «таблиғи муносибатҳои ғайрианъанавии ҷинсӣ» арзёбӣ шудааст.

Додгоҳ ҳарду шаҳрванди Тоҷикистонро тибқи моддаи 6.21-и Кодекси ҳуқуқвайронкунии маъмурии Русия гунаҳкор донистааст. Ба онҳо 10 шабонарӯз ҳабси маъмурӣ таъин шуда, ҳамзамон қарор дар бораи ихроҷи маҷбурӣ аз қаламрави Русия содир шудааст.

Парванда дар заминаи қонунгузории Русия сурат гирифтааст. Дар ин кишвар созмони байналмилалии ЛГБТ ҳамчун созмони экстремистӣ эътироф ва фаъолияташ мамнуъ шудааст.

Мақомоти Русия номи шаҳрвандони Тоҷикистонро нашр накардаанд. Ҳамчунин, маълум нест, ки онҳо пас аз анҷоми муҳлати ҳабси маъмурӣ кай аз Русия ихроҷ карда мешаванд.

Dialog.tj