Як шаҳрванди 40-солаи Тоҷикистон баъди ворид шудан ба Русия бо доруҳои тестостерон ва нандролон (доруҳои афзоиши мушак) дар майдони ҳавоии “Пулково” -и Санкт-Петербург боздошт гардид. Мақомоти Русия ин моддаҳоро ба гурӯҳи доруҳои қавиамал ё афзояндаи аз меъёр зиёди қувва дохил намуда, нисбат ба ӯ парвандаи ҷиноӣ боз кардаанд.

Ин мард аз Тоҷикистон бо хатсайри Душанбе -Санкт-Петербург сафар карда буд. Дар вақти гузаронидани санҷиш дар долони “сабз” кормандони гумрук ба ӯ таваҷҷуҳ намудаанд.

Дар боғоҷи мусофир зарфҳои шишагӣ пайдо гардида, дар ҷайби куртааш низ доруҳо ошкор шудаанд. Ташхиси коршиносон муайян намуд, ки дар миёни онҳо тестостерон, гормони мардона барои рушди мушакҳо ва нандролон, моддаи гормонӣ барои афзоиши ҳаҷми мушакҳо мавҷуд будааст.

Шаҳрванди Тоҷикистон гуфт, ки ин доруҳоро барои афзоиши массаи мушакӣ истифода мебарад. Тибқи гуфтаи худаш, ӯ онҳоро дар Тоҷикистон аз як шахси ношинос ва бидуни дорухати табиб харидааст.

Кормандони мақомоти ҳифзи ҳуқуқ ин мардро дар майдони ҳавоӣ боздошт намудаанд. Нисбат ба ӯ бо гумони қочоқи моддаҳои неруафзо парвандаи ҷиноӣ боз шудааст.

Дар бораи ҳувияти шаҳрванди Тоҷикистон ва ҷузъиёти дигари тафтишот то ҳол маълумоти бештар нашр нашудааст.

Dialog.tj