Ширкати миллии атомии Қазоқистон «Казатомпром» барои интиқоли консентрати урани табиӣ ба Чин ва Русия ба мувофиқа расидааст. Ҳаҷм, муҳлат ва арзиши ин созишҳо ҳанӯз ошкор нашудаанд.

Ширкати «Казатомпром» эълон кардааст, ки ду созишномаи бузург барои фурӯши консентрати урани табиӣ дар шакли U3O8 ба ширкатҳои чинӣ ва русӣ омода шудааст.

Яке аз харидорон ширкати чинии “State Nuclear Uranium Resource Development Company (SNURDC)” мебошад. Ин ширкат ба гурӯҳи энергетикии “State Power Investment Corporation” (SPIC) дохил шуда, уран ва маводи сӯзишвории ҳастаиро барои саноати Чин таъмин мекунад.

Бар асоси созиш, урани қазоқӣ тавассути роҳи оҳан ба истгоҳи Алашанкоу дар марзи Қазоқистон ва Чин интиқол дода мешавад.

Созиши дуюм бо ширкати русии “Uranium One Group”, ки дар сохтори «Росатом» фаъолият мекунад, пешбинӣ шудааст. Тибқи нақша, уран ба Корхонаи кимиёвии Сибир дар Русия фиристода хоҳад шуд.

«Казатомпром» мегӯяд, ки ҷонибҳо шартҳои асосии ҳар ду муомиларо мувофиқа кардаанд. Бо вуҷуди ин, маълумот дар бораи ҳаҷми урани интиқолшаванда, нарх ва муҳлати иҷрои шартномаҳо ба далели сирри тиҷоратӣ нашр нашудааст.

Ширкати қазоқӣ таъкид кардааст, ки параметрҳои ин созишҳо ба вазъи кунунии бозори уран мувофиқат мекунанд.

Ин созишҳо дар ҳоле ба даст меоянд, ки Қазоқистон мавқеи худро ҳамчун яке аз таъминкунандагони асосии уран дар бозори ҷаҳонӣ нигоҳ медорад. «Казатомпром» ҳамчунин, дар нимсолаи аввали соли 2026 истеҳсоли уранро нисбат ба соли гузашта 9 дарсад афзоиш додааст.

Dialog.tj