Туркия барои боздошти Бенямин Нетаняҳу, нахуствазири Исроил, бо иттиҳоми ҷиноят зидди башарият, наслкушӣ ва дигар ҷиноятҳо фармони байналмилалии боздошт содир кардааст. Ин тасмим дар пасманзари таҳқиқоти мақомоти Туркия дар бораи боздошти фаъолони корвони кумакрасон ба Ғазза гирифта шудааст.

Акин Гюрлек, вазири адлияи Туркия дар шабакаи иҷтимоии “X” навишт, ки Нетаняҳу ва як шаҳрванди дигари Исроил ба наслкушӣ, маҳдудсозии шадиди озодӣ, шиканҷа ва дигар ҷиноятҳо муттаҳам мешаванд.

Ба гуфтаи мақомоти Туркия, тақрибан 430 фаъоли байналмилалӣ, ки бо як корвони кумакрасон аз Туркия ба сӯйи навори Ғазза ҳаракат мекарданд, моҳи май аз ҷониби неруҳои Исроил дар баҳри Миёназамин боздошт шуданд. Бархе аз иштирокчиён баъдтар аз хушунат ва муносибати таҳқиромез ҳангоми боздошт хабар доданд.

Пештар низ Туркия нисбат ба Нетаняҳу ва бархе аъзои ҳукумати Исроил бо иттиҳоми наслкушӣ дар ҷанги Ғазза фармонҳои боздошт содир карда буд.

Дафтари сарвазири Исроил дар вокуниш ба қарори Туркия гуфт, ки Исроил «аз риёкории Туркия» таъсир намепазирад.

Дар изҳорот Раҷаб Тайиб Эрдуғон, президенти Туркия, «диктатори яҳудиситез» номида шуда, ӯ ба саркӯби мардуми худ ва пуштибонӣ аз Ҳамос муттаҳам шудааст. Эрдуғон дар гузашта борҳо Нетаняҳуро ба «наслкушӣ» муттаҳам карда, ӯро бо Адолф Ҳитлер муқоиса кардааст.

Муносибатҳои Туркия ва Исроил аз замони ҳамлаи 7-уми октябри соли 2023 ба Исроил ва оғози ҷанги Ғазза ба шиддати бесобиқа рӯ ба рӯ шудаанд.

Таниш миёни ду кишвар ахиран бар асари рӯйдодҳо дар Сурия низ бештар шудааст. Артиши Исроил рӯзи сешанбе ба пойгоҳи ҳавоии Абулзуҳур дар Сурия, воқеъ дар наздикии марзи Туркия, ҳамлаи ҳавоӣ анҷом дод.

Исроил ин ҳамларо «ҳушдор» номид ва гуфт, ки Димишқ дар остонаи нақзи вазъи мавҷудаи мувофиқашуда дар масъалаҳои амниятӣ қарор дошт. Туркия ин гуфтҳоро рад карда, Нетаняҳуро муттаҳам кард, ки мехоҳад ҳамла ба пойгоҳро бо «иддаоҳои беасос» асоснок кунад.

Мақомоти Сурия низ гуфтаанд, ки ҳеч нақшае барои ҳузури доимии низомии Туркия дар ин пойгоҳ вуҷуд надорад.

Dialog.tj