Ситоди мураббиёни мунтахаби Тоҷикистон бо роҳбарии Игор Ангеловский ҳайати васеи дастаро барои бозиҳои дӯстонаи моҳҳои сентябр ва октябр эълон кард.

Тавре ки Федератсияи футболи Тоҷикистон хабар додааст, дар рӯзҳои ФИФА-и моҳҳои сентябр ва октябр тими миллии Тоҷикистон се бозии дӯстона баргузор мекунад.

Гуфта мешавад, ки 23-юми сентябр мунтахаби мо дар шаҳри Боку бо тими миллии Озарбойҷон рақобат мекунад. Инчунин, дар назар аст, ки аввали моҳи октябр мунтахаби Тоҷикистон дар сафар боз ду бозии дӯстона анҷом медиҳад.

Тибқи иттилои дастрас, ба ҳайати васеи мунтахаби Тоҷикистон 38 футболбоз шомил шудаанд, аз ҷумла 4 дарвозабон, 12 ҳимоятгар, 16 нимҳимоятгар ва 6 ҳамлагар. Афзуда мешавад, ки аз ин шумора 26 бозигар барои иштирок дар ҷамъомади таълимию тамринӣ, ки рӯзи 17-уми сентябр оғоз мешавад, даъват хоҳанд шуд.

Маълум шуд, ки ба далели доштани ҷароҳат дар бозиҳои дӯстонаи дарпешистода ҳимоятгар Манучеҳр Сафаров ва нимҳимоятгар Амадонӣ Камолов иштирок карда наметавонанд.

Dialog.tj