Бо фаро расидани оғози соли нави таҳсил дар донишгоҳҳои Чин теъдоди шаҳрвандони Тоҷикистон, ки барои гирифтани раводид (виза) ба сафорати ин кишвар дар Душанбе муроҷиат мекунанд, зиёд шудааст.

Го Ҷитсзюн, сафири Ҷумҳурии халқии Чин дар Тоҷикистон чанд рӯз пеш бо донишҷӯён ва дигар шаҳрвандони тоҷик, ки барои сафар ба Чин омодагӣ мебинанд, мулоқот анҷом дод.

Дар ҷараёни ин мулоқот сафир аз ҳозирин дар бораи ҳадафҳои сафарашон пурсида, бо онҳо масъалаҳои марбут ба раванди гирифтани визаро баррасӣ кард. Шаҳрвандони тоҷик андешаву пешниҳодҳои худро оид ба сифати хизматрасониҳои вобаста ба виза баён намуданд.

Донишҷӯёни тоҷик аз имконияти таҳсил дар донишгоҳҳои Чин истиқбол намуда, зикр карданд, ки барои оғози таҳсил ва зиндагӣ дар ин кишвар бесаброна интизорӣ мекашанд. Онҳо, ҳамчунин, изҳори умед намуданд, ки таҷрибаи бадастовардаашон дар оянда ба таҳкими робитаҳои Тоҷикистон ва Чин мусоидат хоҳад кард.

Dialog.tj