Ҷабҳаи озодии Афғонистон мегӯяд, дар пайи даргирии шадид бо гурӯҳи террористии Толибон дар ноҳияи Зебоки вилояти Бадахшон, ба нерӯҳои ин гурӯҳ талафоти сангин ворид шудааст.

Ба гуфтаи ин ҷабҳа, даргирӣ шоми панҷшанбе, 20-уми август тақрибан соати 16:00 оғоз шуда, то соати 19:30 идома кардааст. Дар ин набард, ба иттилои Ҷабҳаи озодӣ, аз силоҳҳои сабук ва сангин истифода шуда, мавқеъҳои Толибон ҳадафи ҳамла қарор гирифтаанд.

Ҷабҳаи озодии Афғонистон иддао кардааст, ки дар натиҷаи ин даргирӣ шаш ҷангҷӯи Толибон кушта ва дастикам 10 нафари дигар захмӣ шудаанд. Гуфта мешавад, ҷасади шаш нафар дар майдони ҷанг боқӣ монда, захмиён барои табобат ба марказҳои тиббии ноҳияи Зебок ва шаҳри Файзобод интиқол дода шудаанд.

Ин ҷабҳа ҳамчунин, гуфтааст, ки Толибон талош кардаанд мавқеъҳои нерӯҳои онро тасарруф кунанд, аммо ин кӯшиш ноком шуда, нерӯҳои Толибон маҷбур ба ақибнишинӣ шудаанд. То замони нашри ин хабар, ин иддаоҳо аз ҷониби манбаъҳои мустақил ё Толибон ба таври алоҳида тасдиқ нашудаанд.

Dialog.tj