Дар давраи истиқлол шумораи корхонаҳои саноати ғизоии Тоҷикистон беш аз даҳ баробар афзоиш ёфта, аз 90 корхона дар соли 1991 ба 921 корхона дар соли 2025 расидааст.

Ин рақамро Шералӣ Кабир, вазири саноат ва технологияҳои нави Тоҷикистон рӯзи 20-уми август зимни ифтитоҳи нахустин Форуми байналмилалии саноати ғизо дар Душанбе эълом кард.

Ба гуфтаи Шералӣ Кабир ҳаҷми истеҳсоли маҳсулот дар ин бахш дар соли 2025 ба 12,4 миллиард сомонӣ, ё тақрибан 1,35 миллиард доллар, расидааст. Ин нишондиҳанда нисбат ба соли қаблӣ 16 дарсад бештар гуфта мешавад.

Ҳоло ҳиссаи саноати ғизо дар сохтори умумии истеҳсолоти саноатии Тоҷикистон тақрибан 19 дарсадро ташкил медиҳад.

Шералӣ Кабир таъкид кард, ки рушди босуръати соҳа ба таъсиси ҳазорҳо ҷойи нави корӣ, афзоиши коркарди ашёи хоми дохилӣ ва беҳтар шудани сифати умумии маҳсулоти озуқаворӣ мусоидат кардааст.

Шералӣ Кабир таъкид кард, яке аз вазифаҳои калидии солҳои наздик амиқтар кардани коркарди ашёи хом ва афзоиши арзиши иловагии маҳсулоти истеҳсоли дохилӣ мебошад. Барои расидан ба ин ҳадаф, Тоҷикистон мехоҳад инфрасохтори логистикиро навсозӣ кунад, талафоти маҳсулотро ҳангоми интиқол коҳиш диҳад ва стандартҳои амнияти озуқавориро ба талаботи байналмилалӣ мутобиқ намояд. Ҳамзамон, тавсеаи содироти маҳсулоти рақобатпазир ба бозорҳои хориҷӣ низ аз самтҳои афзалиятноки соҳа арзёбӣ мешавад.

Вазир, инчунин, гуфт, ки ба ҷалби сармояи дохиливу хориҷӣ ба лоиҳаҳои инноватсионӣ, аз ҷумла коркарди маҳсулот, бастабандии муосир ва логистика таваҷҷуҳи хоса зоҳир мегардад. Рақамикунонии равандҳои истеҳсолӣ ва идоракунӣ низ аз ҷумлаи самтҳои муҳимми рушди минбаъдаи саноати ғизоии Тоҷикистон номбар шудааст.

Дар Форуми байналмилалии саноати ғизо, ки то 21-уми август идома мекунад, тақрибан 500 намоянда аз 15 кишвар иштирок доранд. Дар миёни онҳо намояндагони Озарбойҷон, Русия ва Ӯзбекистон, инчунин, истеҳсолкунандагон, шарикони байналмилалӣ, коршиносон ва соҳибкорон ҳузур доранд. Иштирокдорони форум масъалаҳои сифату амнияти маҳсулоти ғизоӣ, иқтидори содиротӣ ва ҳамгироии истеҳсолкунандагони ватанӣ ба занҷираҳои ҷаҳонии таъминотро баррасӣ мекунанд.

Форум бо баргузории намоишгоҳи васеи маҳсулоти озуқаворӣ ба анҷом мерасад.

Dialog.tj