Баландии сарбанди Неругоҳи барқи обии (НБО) Роғун ба 1155 метр аз сатҳи баҳр расид. Хадамоти матбуоти Президенти Тоҷикистон хабар медиҳад, ки ин кор пеш аз муҳлати қаблан муайяншуда анҷом дода шудааст.

Пешвои миллат муҳтарам Эмомалӣ Раҳмон зимни сафари корӣ ба НБО-и Роғун бо ҷараёни корҳои сохтмонӣ шинос шуданд. Қаблан президент ба муҳандисон ва сохтмончиён супориш дода буданд, ки то охири соли 2026 баландии сарбандро ба 1155 метр аз сатҳи баҳр расонанд ва сатҳи оби обанборро то 1140 метр баланд бардоранд.

Тибқи иттилои Хадамоти матбуоти Президент, корҳои баланд бардоштани сарбанд мутобиқи дастурҳои тасдиқшуда ва нақшаи корӣ анҷом шуда, ҳоло пур кардани обанбор то нишони 1140 метр дар назар аст.

Эмомалӣ Раҳмон ҳамчунин, аз рафти корҳои сохтмонӣ дар баромадгоҳи нақби нақлиётии рақами 9 дар самти шаҳри Роғун, дар баландии 1300 метр аз сатҳи баҳр, боздид кардаанд.

Дар сохтмони НБО-и Роғун ҳазорон нафар кор мекунанд. Корҳо шабонарӯзӣ дар ду баст идома дошта, ҳамарӯза беш аз 160 адад техника ва механизмҳои муосир истифода мешаванд. Сохтмони НБО-и Роғун дар рӯди Вахш соли 1987 оғоз шуда, баъди пошхӯрии Иттиҳоди Шӯравӣ ва оғози ҷанги шаҳрвандӣ дар солҳои 1990 қатъ гардид. Корҳои сохтмонӣ соли 2016 расман аз сар гирифта шуданд.

Тибқи лоиҳа, баландии ниҳоии сарбанди НБО-и Роғун 335 метр хоҳад буд, ки дар сурати анҷоми сохтмон онро ба баландтарин сарбанди сангрезаӣ дар ҷаҳон табдил медиҳад. Иқтидори лоиҳавии неругоҳ пас аз ба кор даромадани шаш агрегат 3,6 ҳазор мегаватт пешбинӣ шудааст.

Айни замон ду агрегати неругоҳ фаъол мебошанд. Агрегати аввал 9-юми сентябри соли 2018 ва агрегати дуюм соли 2019 ба истифода дода шуданд.

Dialog.tj