Донишманди тоҷик Абдунабӣ Сатторзода Эмомалӣ Раҳмонро бунёдгузори сиёсати хориҷии нави Тоҷикистон номида, гуфтааст, ки дар 35-соли Истиқлол сиёсати хориҷии кишвар ба самти фаъол, мутавозин ва бисёрсамта рушд кардааст.

Дар нишасти илмию амалӣ бахшида ба нақши Пешвои миллат, муҳтарам Эмомалӣ Раҳмон дар арсаи байналмилалӣ, ки 19-уми август дар бинои нави Ҳукумати Тоҷикистон баргузор шуд, Абдунабӣ Сатторзода таъкид кардааст, ки асосҳои сиёсати хориҷии кишварро Эмомалӣ Раҳмон ҳанӯз соли 1992 дар муроҷиат ба мардуми Тоҷикистон муайян карда буд.

Ба гуфтаи ӯ, ин самтҳо аз ворид шудани Тоҷикистон ба ҷомеаи ҷаҳонӣ ва барқарор кардани муносибатҳои дипломатӣ то узвият дар созмонҳои байналмилалӣ, таҳкими муносибатҳои неки ҳамсоягӣ ва пайдо кардани ҷойгоҳи муносиб дар ҷомеаи ҷаҳонӣ иборат буданд.

Профессор Абдунабӣ Сатторзода ҳамчунин, ба нақши Эмомалӣ Раҳмон дар ташаккули Консепсияи сиёсати хориҷии Тоҷикистон ишора карда, гуфт, ки тағйироти минбаъдаи сиёсати ҷаҳонӣ зарурати такмили санадҳои стратегии кишварро ба миён овардааст.

Профессор Абдунабӣ Сатторзода дар гузориши худ ташаббусҳои Тоҷикистон дар масъалаҳои об ва сулҳро низ аз самтҳои муҳимми сиёсати хориҷии кишвар арзёбӣ кард. Ба гуфтаи ӯ, ташаббусҳои марбут ба об боис шудаанд, ки масъалаи об ба яке аз мавзуъҳои доимии рӯзномаи байналмилалӣ табдил ёбад.

Абдунабӣ Сатторзода, инчунин, қатъномаи ахири Маҷмаи умумии СММ оид ба «Даҳсолаи байналмилалӣ оид ба таҳкими сулҳ барои наслҳои оянда дар солҳои 2027–2036»-ро аз дастовардҳои муҳимми сиёсати хориҷии Тоҷикистон номид ва онро ба таҷрибаи сулҳи тоҷикон пайванд дод.

“Тавре ки шумо хабар доред, 25-уми июли соли равон Маҷмаи умумии СММ дар асоси пешниҳоди Президенти муҳтарами Тоҷикистон Эмомалӣ Раҳмон қатъномаи махсусеро бо номи “Даҳсолаи байналмилалӣ оид ба таҳкими сулҳ барои наслҳои ояндаро дар солҳои 2027 ва 2036”-ро қабул намуд.  Аз тарафи бонуфузтарин сохтори СММ қабул гардидани қатъномаи махсуси “Даҳсолаи байналмилалӣ оид ба таҳкими сулҳ барои наслҳои оянда дар солҳои 2027 ва 2036” яке аз дастовардҳои бузурги сиёсати хориҷии Ҷумҳурии Тоҷикистон ба шумор меравад, ки маҳз ба шарофати обрӯ ва эътибори баланди роҳбари ҷумҳуриамон дар арсаи байналмилаӣ амалӣ гардид ва таъкид мекунам, ки он тасодуфӣ ҳам нест”- зикр кард Абдунабӣ Сатторзода

Дар ҷамъбасти гузориш ӯ гуфт, ки сиёсати хориҷии Тоҷикистон дар даврони истиқлол марҳала ба марҳала фаъол, амалгаро, воқеъбинона, ҳадафманд ва бисёрсамта шудааст.

Нишасти илмию амалӣ бо иштироки намояндагони Дастгоҳи иҷроияи Президент, собиқадорони дипломатияи тоҷик, аз ҷумла академик Талбак Назаров, Абдулмаҷид Достиев, Қозидавлат Қоимдодов, Рамазон Мирзоев, Эркин Раҳматуллоев ва Абдунабӣ Сатторзода баргузор гардид.

Dialog.tj