Аз аввали соли ҷорӣ то имрӯз ба бозорҳои пойтахт беш аз 2 ҳазор тонна гӯшти гови Беларусия ворид карда шудааст. Дар ин бора масъулони КВД «Истеҳсол, харид, нигоҳдорӣ ва фурӯши молҳои ниёзи аввал дар шаҳри Душанбе» хабар додаанд.

Ба гуфтаи масъулони корхонаи зикршуда, гӯшти воридотӣ тибқи анъанаҳои миллӣ забҳ шуда, дорои тамғаи «Ҳалол» мебошад ва ба талаботи санитарию эпидемиологӣ ҷавобгӯ аст.

Ҳар ҳафта ба Душанбе аз корхонаҳои коркарди гӯшт дар шаҳрҳои Гродно, Пинск, Слоним ва Слутск аз 80 то 90 тонна гӯшт ворид мешавад. Фурӯши он дар нуқтаҳои махсуси савдои корхона дар бозорҳои коммуналии пойтахт ба роҳ монда шудааст.

Нархи тасдиқшудаи як килограмм гӯшти гови Беларус ҳоло 65 сомонӣ муқаррар шудааст.

Мақомоти масъул мегӯянд, ки воридоти гӯшт ба хотири танзими нарх ва нигоҳ доштани фаровонии маҳсулот дар бозор сурат мегирад. Дар ин давра дар баробари гӯшти  Беларусия,  аз Қазоқистон низ тақрибан 400 тонна гӯшти гов ба пойтахт ворид карда шудааст.

Dialog.tj