Сайёҳи ӯзбек Бахтовар Қазоқов баъди нашри навори баҳсбарангез аз суҳбат бо як марди солхӯрдаи яҳудӣ дар Ҳамадон, ки дар он суханони таҳқиромез нисбат ба яҳудиён баён мешаванд, бо вокунишҳои тунди корбарони шабакаҳои иҷтимоии Эрон рӯбарӯ шуд.

Бахтовр Қазоқов баъд аз паҳн шудани навор онро аз шабакаҳои иҷтимоӣ ҳазф карда, бо нашри як паёми видеоӣ аз мардуми Эрон, бахусус сокинони Ҳамадон, узр хост.

Навори баҳсбарангез дар оромгоҳи таърихии Эстер ва Мордахай дар Ҳамадон сабт шудааст. Дар он сайёҳи ӯзбек аз марди яҳудӣ мепурсад, ки дар Ҳамадон чанд нафар яҳудӣ зиндагӣ мекунанд. Марди солхӯрда посух медиҳад, ки шумораи онҳо хеле кам буда, эҳтимол тақрибан панҷ нафар аст. Бахтовар Қазоқов дар ҷавоб ибораи таҳқиромез истифода мекунад. Дар идомаи суҳбат ӯ ба эътиқоди яҳудиён ишора карда, бо суханоне таҳқиромез онҳоро мавриди ҳамла қарор медиҳад.

Бино ба вокунишҳои корбарони эронӣ, марди солхӯрдае, ки дар навор дида мешавад, омӯзгори маъруфи бознишаста буда, ҳоло дар оромгоҳи Эстер ва Мордахай ба ҳайси нигаҳбон фаъолият мекунад.

Бахтовар Қазоқов ҳамчунин, дар ҷараёни суҳбат иддао мекунад, ки қаблан дар Ӯзбекистон як яҳудиро задааст. Ба гуфтаи ӯ, баъдан дар додгоҳ аз ин кораш изҳори пушаймонӣ карда ва ваъда додааст, ки дигар чунин рафтор нахоҳад кард. Ин навор дар шабакаҳои иҷтимоӣ вокунишҳои шадид ба бор овард. Бархе корбарони эронӣ суханони сайёҳи ӯзбекро намунаи ошкори яҳудиситезӣ номида, ба ӯ барои муносибаташ бо марди солхӯрда эътироз карданд.

Бахтовар Қазоқов, ки тибқи маълумоти нашршуда сокини Тошканд ва рассом аст ва дар шаш моҳи ахир борҳо ба Эрон сафар кардааст. Ӯ дар аввали моҳи июни соли ҷорӣ низ акси супоридани портрети раҳбари пешини Ҷумҳурии Исломии Эрон Алӣ Хоманаиро ба Ҳасан Сафархонӣ, мушовири равобити фарҳангии сафорати Эрон дар Тошканд, нашр карда буд.

Ӯ он замон навишта буд, ки бо дипломати эронӣ дар бораи «ҷозибаҳои таърихии Эрон, фарҳанги ғанӣ ва имкониятҳои сайёҳӣ» суҳбат кардааст ва қасд дорад дар оянда низ ба Эрон сафарҳои бештар анҷом дода ва аз сафарҳояш барои шабакаҳои иҷтимоӣ маводи видеоӣ таҳия кунад.

Пас аз вокунишҳои шадид Бахтовар Қазоқов дар як навори узрхоҳӣ гуфт, ки аз суханони худ пушаймон аст: «Барои беадабие, ки кардам, ҳамчун як ҳамватан аз ҳамаи шумо, эрониён ва ҳамадониҳо, узр мехоҳам», гуфт ӯ. Бохтовар Қазоқов дар шарҳи навори узрхоҳӣ дар “Instagram” ҳамчунин, навишт, ки тасаввур намекардааст, эрониён то ин ҳад аз якдигар пуштибонӣ мекунанд.

Ҳодиса дар ҳолест, ки наворҳои сайёҳӣ ва муносибати блогерҳо бо ҷомеаҳои маҳаллӣ дар солҳои охир ба яке аз мавзуъҳои баҳсбарангези шабакаҳои иҷтимоӣ табдил ёфтаанд. Ин маврид бошад, ба далели истифодаи ибораҳои таҳқиромез нисбат ба як ақаллияти мазҳабӣ вокуниши густардатар ба бор овардааст.

Dialog.tj