Теъдоди низомиёни амрикоии кушташуда ва захмӣ дар ҷанг бо Эрон аз нав ба сатҳи баланд расид. Бар асоси маълумоти навшудаи Пентагон, аз оғози даргирӣ то кунун 18 низомии амрикоӣ кушта шуда, 757 нафари дигар захм бардоштаанд.

Шабакаи “Си-эн-эн” (CNN) бо истинод ба маълумоти талафоти ҷангии сомонаи Вазорати дифои ИМА хабар дод, ки Пентагон рӯзи чоршанбе омори талафотро навсозӣ кардааст. Дар ин навсозӣ беш аз 50 мавриди нави захмӣ шудани низомиёни амрикоӣ ба қайд гирифта шудааст.

Гуфта мешавад, ин омор ба маълумоти низоми «Таҳлили талафоти мудофиа» (DCAS) ва бахши марбут ба «амалиёти хориҷӣ» ва ҳамчунин, маълумоти амалиёте, ки бо номи «Хашми эпикӣ» зикр мешавад, асос ёфтааст.

“Си-эн-эн” менависад, ки аз замони оғози ҷанг дар 28-уми феврал, дар маҷмуъ 18 низомии амрикоӣ кушта ва 757 нафар захмӣ шудаанд.

Пентагон моҳи гузашта бахши «амалиёти хориҷӣ»-ро дар низоми “DCAS” барои сабти маълумоти низомиёни кушташуда ва захмӣ аз 7-уми июл таъсис дода буд. Аммо то ҳол мақомоти низомии ИМА шарҳи пуррае дар бораи он, ки талафоти сабтшуда ба кадом даргириҳо марбутанд, пешниҳод накардаанд.

Санаи 7-уми июл ҳамзамон ба рӯзе рост меояд, ки ҳукумати Доналд Трамп тибқи Қонуни ваколатҳои ҷангӣ ба Конгресс аз оғози як даргирии нави марбут ба Эрон хабар дода буд.

“Си-эн-эн” мегӯяд, барои гирифтани шарҳи бештар дар бораи ин бахши оморӣ аз Пентагон дархост кардааст.

Навсозии ахири омор дар ҳоле сурат гирифтааст, ки Пентагон қаблан барои тағйироти ғайриодӣ дар рақамҳои талафот мавриди интиқоди расонаҳо ва бархе қонунгузорони амрикоӣ қарор гирифта буд. Моҳи гузашта номи чор низомии кушташуда ва даҳҳо низомии захмӣ аз омори расмӣ ҳазф шуда, баъдан дубора ба рӯйхати талафот баргардонида шуданд.

Вазорати дифои ИМА он вақт иддао карда буд, ки коҳиши муваққатии рақамҳо ба далели «мушкилоти муваққатии маълумотӣ» ба вуҷуд омадааст. “Си-эн-эн”, инчунин, қаблан гузориш дода буд, ки Пентагон дар ҷараёни ҷанг бо Эрон дар нашри омори низомиёни захмӣ таъхир доштааст. Мақомоти амрикоӣ ин таъхирро ба масъалаҳои амниятӣ рабт дода буданд. Ҳамин тавр, омори навшудаи Пентагон бори дигар миқёси талафоти артиши Амрикоро дар ин даргирӣ ба маркази таваҷҷуҳ овардааст.

Dialog.tj