Тақрибан 2,4 миллион духтар дар Афғонистон бинобар манъи таҳсил баъд аз синфи шашум аз идомаи таҳсилоти миёна маҳрум шудаанд. Намояндаи ЮНЕСКО гуфтааст, ин рақам аз арзёбии қаблии 2,2 миллион нафар бештар аст.

Хода Ҷабериан, ҳамоҳангсози барномаи ЮНЕСКО оид ба маориф дар ҳолатҳои фавқулода, рӯзи 11-уми август гуфт, ки ин ҳисоб танҳо духтаронеро дар бар мегирад, ки наметавонанд таҳсилро дар мактаби миёна идома диҳанд.

Ба гуфтаи ӯ, афзоиши шумори онҳо аз 2,2 ба 2,4 миллион натиҷаи таъсири ҷамъшавандаи маҳдудиятҳо мебошад, зеро ҳар сол насли нави духтарон ба синни таҳсилоти миёна мерасанд.

Маҳдудиятҳо ба духтароне, ки аз кишварҳои ҳамсоя ба Афғонистон бармегарданд, низ таъсир мерасонанд. Тибқи маълумоти ЮНЕСКО, духтарони то 15-сола 56 дарсади бозгаштагони кунуниро ташкил медиҳанд. Духтароне, ки дар хориҷ ба мактаби миёна мерафтанд, пас аз бозгашт ба Афғонистон наметавонанд таҳсили худро идома диҳанд.

ЮНЕСКО мегӯяд, муайян кардани шумори заноне, ки дар сурати набудани маҳдудиятҳо метавонистанд ба донишгоҳ дохил шаванд, имконнопазир аст. Барои чунин ҳисоб бояд маълум бошад, ки чанд духтар мактабро хатм мекарданд ва чанд нафари онҳо ба донишгоҳ роҳ меёфтанд.

Мақомоти гурӯҳи террористии Толибон ҳамчунин, таҳсили занонро дар донишгоҳҳо, аз ҷумла донишгоҳҳои тиббӣ, манъ кардаанд. Ба гуфтаи ЮНЕСКО, занон, инчунин, бо маҳдудият дар гирифтани диплом ва дигар ҳуҷҷатҳои тасдиқкунандаи таҳсил рӯбарӯ ҳастанд.

Ба гуфтаи Ҷабериан, маҳдудиятҳо ба таҳсили писарон низ таъсир расондаанд. Дар баъзе ҳолатҳо ба онҳо омӯзгорони таҷриба ва омодагии кофӣ надошта дарс медиҳанд ё ба далели маҳдудиятҳои корӣ барои мутахассисони соҳибтахассус омӯзгор намерасад.

ЮНЕСКО ба барномаҳои таҳсили фосилавӣ ва саводомӯзӣ ишора карда мегӯяд, ки онҳо наметавонанд дарсҳои пурраи синфиро бо иштироки омӯзгорони касбӣ иваз кунанд.

Созмон бори дигар аз мақомоти Толибон даъват кардааст, ки дастрасии духтарон ва занонро ба таҳсилоти миёна ва олӣ фавран ва бидуни шарт барқарор кунанд.

Dialog.tj