Дар шаҳри Исфараи вилояти Суғд мақомоти интизомӣ мардеро ба содир кардани амалҳои бадахлоқона нисбат ба занон бо истифода аз эътимоди динии онҳо гумонбар медонанд.

Вазорати корҳои дохилии Тоҷикистон мегӯяд, ин ҳолат дар ҷараёни чорабиниҳои оперативӣ-ҷустуҷӯӣ аз ҷониби кормандони ШВКД-1 дар шаҳри Исфара ошкор шудааст.

Ба иттилои Вазорат, гумонбар Исомиддинов Садриддин, соли таваллудаш 1981, сокини шаҳри Конибодом буда, дар Исфара муваққатан зиндагӣ мекардааст. Мақомот мегӯянд, ӯ қаблан низ бо қисми 4-и моддаи 247-и Кодекси ҷиноятии Тоҷикистон суд шудааст.

Тибқи маълумоти ВКД, мард гӯё бо баҳонаи хондани дуо ба заноне, ки барои гирифтани кумак ба назди ӯ меомаданд, амалҳои бадахлоқона анҷом медодааст.

Яке аз ҳолатҳои зикршуда ба 13-уми августи соли 2026 рост меояд. Ба гуфтаи мақомот, гумонбар ба манзили як сокини шаҳри Исфара рафта, худро барои хондани дуо муаррифӣ кардааст. ВКД мегӯяд, ӯ ҳангоми анҷоми ин амал аз эътимоди динии зан истифода карда, нисбат ба ӯ рафтори бадахлоқона нишон додааст.

Дар робита ба ин қазия нисбат ба Исомиддинов парвандаи ҷиноятӣ оғоз шудааст.

Мақомоти Тоҷикистон мегӯянд, тафтиши парванда идома дорад. Ҷузъиёти дигари қазия, аз ҷумла мавқеи гумонбар ва натиҷаи ниҳоии тафтишот то ҳол расман нашр нашудааст.

Гумонбар то замони собит шудани гуноҳаш дар додгоҳ мутобиқи қонун бегуноҳ дониста мешавад.

Dialog.tj