Як сайти амрикоӣ навишт, ки ҷобаҷокунии фаврии як киштии ҳавопаймобари ИМА аз Ҷопон ба Ховари Миёна нигарониҳоро дар миёни муттаҳидони Вашингтон дар бораи қобилияти ин кишвар барои нигоҳ доштани ҳузури низомӣ дар чанд минтақа ҳамзамон афзоиш додааст.

Бар асоси гузориши ин расона, интиқоли киштии ҳавопаймобари “USS George Washington” аз Ҷопон ба Ховари Миёна барои иваз кардани киштии “USS Abraham Lincoln” боис мешавад, ки ИМА дар ҳоле ки рақибонаш фаъолияти низомии худро намоиш медиҳанд, дар ғарби Уқёнуси Ором киштии ҳавопаймобари дигаре надошта бошад.

Ба навиштаи сайти “Аксиос” (Axios) холигӣ дар ҷойгиркунии киштиҳои ҳавопаймобар нишон медиҳад, ки вазъ дар Ховари Миёна то чӣ андоза ба банақшагирии низомии Вашингтон таъсир мерасонад. Ба гуфтаи ин расона, ин вазъ ҳамчунин, саволҳоеро дар бораи қобилияти ИМА барои ҳифзи ҳамзамони ҳузури низомиаш дар ду минтақа ба миён овардааст.

Ба гузориши “Аксиос”, набудани киштии ҳавопаймобар дар ғарби Уқёнуси Ором ва коҳиши тамринҳои муштараки низомӣ бо Кореяи Ҷанубӣ метавонад мавқеи Чинро тақвият диҳад, ки муттаҳидони ИМА набояд пурра ба кафолатҳои амниятии Вашингтон такя кунанд.

Марк Кансиан, афсари бознишастаи артиши ИМА ва мушовири Маркази таҳқиқоти стратегӣ ва байналмилалӣ гуфт, ки Чин метавонад аз чунин холигиҳо барои афзоиши фаъолияти баҳрии худ дар наздикии муттаҳидони ИМА, аз ҷумла Ҷопон ва Тайван, истифода кунад. Ба гуфтаи Марк Кансиан, идомаи чунин вазъ метавонад дар миёни кишварҳои минтақа дар бораи сатҳи дастгирии эҳтимолии низомии ИМА нигарониҳо ва шубҳаҳои бештар ба вуҷуд орад.

Dialog.tj