Вазири корҳои хориҷии ҳукумати Толибон Амирхон Муттақӣ аз Иёлоти Муттаҳида даъват кардааст, ки пас аз панҷ соли хуруҷ ба Афғонистон баргардад, сафорати худро боз кунад ва дар бахшҳои истихроҷи маъдану сохтмони зербиноҳо сармоягузорӣ намояд. Аммо Вашингтон ин пешниҳодро рад карда, мегӯяд, ки Кобул то ҳол ба уҳдадориҳои худ дар мубориза бо терроризм вафо накардааст.

Вазири корҳои хориҷии ҳукумати гурӯҳи террористии Толибон Амирхон Муттақӣ гуфтааст, ки Кобул мехоҳад муносибатҳоро бо ИМА «бар пояи эҳтироми мутақобил» аз нав ба роҳ монад. Ба гуфтаи ӯ, марҳилаи ҷанг ба поён расидааст ва акнун бояд «саҳифаи нави ҳамкории мусбат» оғоз шавад.

Мутаққӣ пешниҳод кардааст, ки ИМА дипломатҳояшро ба Афғонистон баргардонад ва дар истихроҷи захираҳои табиӣ, инчунин, сохтмони сарбандҳо ва роҳҳо сармоягузорӣ кунад. Афғонистон дорои захираҳои қобили таваҷҷуҳи литий, мис, маъдани оҳан ва баъзе металлҳои нодири заминӣ мебошад.

Бо вуҷуди ин, вазири корҳои хориҷии Толибон бозгашти нерӯҳои низомии Амрикоро қатъиян рад кардааст. Ӯ гуфтааст, ки афғонҳо ҳузури низомии кишварҳои дигарро дар қаламрави худ қабул нахоҳанд кард.

Толибон ҳамчунин, мехоҳанд намояндагиҳои дипломатии худро дар ИМА боз кунанд. Ба гузориши рӯзномаҳои амрикоӣ, барқарор кардани робита бо ҳукумати Доналд Трамп яке аз ҳадафҳои асосии талошҳои дипломатии Толибон шудааст.

Аммо Департаменти давлатии ИМА ин пешниҳодро напазируфтааст. Вашингтон мегӯяд, ки Толибон ба уҳдадориҳои худ дар мубориза бо терроризм вафо накардаанд ва иҷоза додаанд, ки қаламрави Афғонистон барои таҳияи ҳамлаҳо истифода шавад.

Дар ҳамин ҳол, муносибатҳои Вашингтон ва Кобул дар моҳҳои охир сардтар шудаанд. ИМА додани бархе раводидҳо ба шаҳрвандони Афғонистонро боздошта, маҳдудиятҳои вуруд ҷорӣ кардааст. Ҳамзамон, Вашингтон ба Покистон наздиктар шудааст: кишваре, ки аввали соли ҷорӣ ба мавзеъҳо дар Афғонистон ҳамлаҳои ҳавоӣ анҷом дода буд.

Миллиардҳо доллар дороиҳои Бонки марказии Афғонистон низ дар ИМА ҳамчунон блокшуда боқӣ мондаанд.

Dialog.tj