Манобеи маҳаллӣ ба расонаҳои Афғонистон гуфтаанд, ки Ҷумъаҷон Фотеҳ пас аз расидан ба майдони ҳавоии Кобул аз сӯйи нерӯҳои гурӯҳи террористии Толибон латукӯб ва ба истихбороти ин гурӯҳ супурда шудааст.

Манобеъ рӯзи душанбе, 17-уми август ба расонаи “8-и субҳ” гуфтаанд, ки нерӯҳои Толибон дар пайи даргирӣ бо афроди Ҷумъаҷон Фотеҳ дар Бадахшон, рафтуомад миёни рустоҳои Қуғуз, Вуҷам ва Нусайро мутаваққиф кардаанд.

Ба гуфтаи манобеъ, беш аз 100 коргари маъдан аз Нусай дар минтақаи Вуҷами Боло иҷозаи рафтан ба хонаҳояшонро наёфтаанд.

Ҳамзамон, тафтиши хона ба хона ва халъи силоҳи афрод дар ин минтақаҳо оғоз шудааст.

Манобеъ мегӯянд, ки шуморе аз нерӯҳои Ҷумъаҷон Фотеҳ ба рустоҳои Шӯриён ва Ҷӯй фирор кардаанд ва танҳо афроди солхӯрда ҳамроҳ бо Муҳаммад Ёсин, масъули логистикаи ин гурӯҳ, дар Қуғуз боқӣ мондаанд.

Dialog.tj