Ҷумъахон Фотеҳ, ҳамроҳ бо чанд тан аз фармондеҳонаш, имрӯз ба гурӯҳи терррористии Толибон таслим шуда ва ба Файзобод, маркази вилояти Бадахшони Афғонистон, интиқол дода шудааст.

Манобеъ рӯзи душанбе, 17-уми август дар суҳбат бо расонаи “8-и субҳ” тасдиқ кардаанд, ки Ҷумъахон Фотеҳ ҳамроҳ бо ҷангҷӯёнаш бо номҳои Ҷумъа, Ёсин, Мусо, Фаттоҳ ва Муваҳҳид ва чанд нафари дигар ба Толибон таслим шудаанд.

Манобеъ меафзоянд, ки то ҳол маълум нест ин афрод пас аз интиқол ба Файзобод ба куҷо бурда хоҳанд шуд ва сарнавишти онҳо низ рӯшан нест.

То кунун Толибон дар бораи таслим шудан ва интиқоли ин афрод ҷузъиёте пешниҳод накардаанд.

Ин дар ҳолест, ки манобеи маҳаллӣ дар Бадахшони Афғонистон рӯзи гузашта гуфта буданд, қарор аст Ҷумъахон Фотеҳ ва Фасиҳуддин Фитрат, раиси ситоди артиши Толибон, дар деҳаи Хӯғз бо ҳам дидору гуфтугӯ кунанд, то дар бораи поёни даргириҳои ахир ба тавофуқ бирасанд.

Dialog.tj