Самандар Муродов, варзишгари тоҷик дар мусобиқаи “CFFC 159” дар ИМА Кристиан Тёрнерро шикаст дода, рекорди касбии худро ба 12 пирӯзӣ аз 12 рақобат расонд. Ҳоло суоли асосӣ ин аст: кай Самандар Муродов ба UFC роҳ меёбад?

Самандар Муродов субҳи 15-уми август дар мусобиқаи “CFFC 159”, ки дар шаҳри Филаделфияи ИМА баргузор гардид, тибқи  қарори доварон ба варзишгари амрикоӣ Кристиан Тёрнер пирӯз гардид. Тёрнер пеш аз ин рақобат дар ҳисоби касбиаш 10 пирӯзӣ ва 3 мағлубият дошт. Рақобат то анҷом идома кард ва доварон пирӯзиро ба намояндаи Тоҷикистон доданд. Бо ин натиҷа Самандар Муродов рекорди касбии худро ба 12-0 расонд. Яъне ӯ дар 12 рақобати касбӣ мағлуб нашудааст.

Ин пирӯзӣ барои Самандар Муродов шанси беҳтарин аст. Варзишгари 26-солаи тоҷик аз моҳи августи соли 2024 дар рақобатҳои расмӣ ширкат накарда буд. Рақобати охирини ӯ 23-уми августи соли 2024 дар мусобиқаи Road to UFC баргузор шуда буд. Он вақт Самандар Муродов бо қарори якдилонаи доварон Ҷонатан Пирсморо мағлуб карда, ҳисоби пирӯзиҳояшро ба 11 расонида буд. Баъди ин рақобат ӯ тақрибан ду сол аз рақобат дур монд. Аз ин рӯ, бозгашт ба мусобиқаҳои касбӣ баъди чунин танаффуси тӯлонӣ барои ӯ санҷиши ҷиддӣ ба ҳисоб мерафт. Самандар Муродов бошад, дар бозгашти худ тавонист бар рақиби амрикоӣ пирӯз шавад ва мақоми худро ҳамчун яке аз размкорони мағлубнашудаи тоҷик нигоҳ дорад.

Самандар Муродов аз соли 2018 дар ММА-и касбӣ рақобат мекунад. Дар ин муддат ӯ дар ҳеч як аз 12 рақобати худ мағлуб нашудааст. Дар ҳисоби ӯ пирӯзиҳо бо нокаут, таслимкунӣ ва қарори доварон мавҷуданд. Панҷ рақобати худро Муродов бо роҳи таслимкунии рақиб ба анҷом расондааст.

Яке аз пирӯзиҳои муҳимми ӯ соли 2021 ба даст омада буд, вақте ки Муродов бар Абдураҳмони Алимагомедов, ки то он вақт мағлуб нашуда буд, ғалаба кард. Баъдан ӯ дар “Eagle FC” камарбанди қаҳрамониро ба даст оварда, Максим Шветсро бо нокаути техникӣ дар раунди чорум мағлуб намуд.

Муродов, инчунин, дар мусобиқаҳои “Road to UFC” ва “UAE Warriors” баромад кардааст. Дар ин давра ӯ бар Ҷиан Сикейра, Лукас Сампайо, Бобур Қурбонов ва Ҷонатан Пирсма пирӯзиҳо ба даст овардааст.

 Ҳоло пирӯзии навбатӣ дар “CFFC” метавонад барои идомаи фаъолияти байналмилалии Самандар Муродов аҳамияти калон дошта бошад. “Cage Fury Fighting Championships” яке аз созмонҳои шинохтаи минтақавии ММА дар ИМА ба ҳисоб меравад ва як қатор варзишгарони он баъдан ба сатҳи баландтар, аз ҷумла UFC, роҳ ёфтаанд.

Самандар Муродов дар айни замон чанд бартарии муҳим дорад: синни ҷавон, рекорди идеалии 12-0, таҷрибаи қаҳрамонӣ, баромад дар чанд созмони байналмилалӣ ва пирӯзиҳо бар рақибони дорои таҷрибаи ҷиддӣ. Қувваи асосии ӯ муборизаи заминӣ ва назорати рақиб дар партер мебошад. Аммо дар солҳои охир Муродов услуби худро бештар такмил дода, ҳамчун размкори ҳамаҷониба низ худро нишон медиҳад. Пас аз пирӯзӣ бар Тёрнер саволи асосӣ дигар танҳо ин нест, ки оё Муродов барои UFC омода аст ё не. Суоли муҳимтар ин аст, ки кай ба ӯ имкони баромад дар бузургтарин созмони ММА-и ҷаҳон дода мешавад.

Бо рекорди 12 пирӯзӣ ва ҳеч гуна мағлубият, бозгашти бомуваффақият ба майдони Амрико ва таҷрибаи рақобат дар созмонҳои байналмилалӣ Самандар Муродовро ба як қадами дигар ба орзуи UFC наздиктар кардааст.

Dialog.tj