Сайид Аббос Ироқчӣ, вазири корҳои хориҷии Эрон таъкид кардааст, ки кишвараш ҳанӯз барои аз сар гирифтани музокирот бо ҷониби Амрико тасмим нагирифтааст.

Сайид Аббос Ироқчӣ дар бораи охирин вазъи Тафоҳумномаи оташбаси Исломобод гуфтааст, ки дар ин санад “хотимаи ҷанг” эълом шудааст ва оташбасе вуҷуд надорад, ки тамдид шавад. Ба гуфтаи ӯ, 60 рӯз фурсат барои музокирот ҷиҳати расидан ба тавофуқи ниҳоӣ пешбинӣ шуда буд, аммо Амрико онро нақз кард ва даргириҳо аз сар гирифта шуданд.

Ироқчӣ гуфтааст, Қатар ва Покистон ба унвони миёнҷӣ танҳо паёмҳоро мубодила мекунанд ва дар тамос ҳастанд, аммо ин ба маънои музокирот нест. Ӯ афзудааст: “Мо ҳанӯз барои оғози дубораи музокирот бо Амрико тасмим нагирифтаем”.

Вазири корҳои хориҷии Эрон ҳамчунин, гуфтааст, ки музокироти Эрон бо Уммон мавзуи комилан ҷудогона ва фаннӣ барои муайян кардани хатҳои баҳрии тангаи Ҳурмуз ва ҳаракати киштиҳост.

Ба гуфтаи ӯ, роҳҳои қаблӣ дигар корбурд надоранд ва ҳоло як роҳи муваққатӣ тарҳрезӣ мешавад, ки баъдан ба роҳи ниҳоӣ табдил хоҳад ёфт.

Ироқчӣ таъкид кардааст, ки музокироти фаннӣ бо Уммон ва бозгушоии тангаи Ҳурмуз ду мавзуи ҷудогона мебошанд. Ҳатто пас аз муайян шудани роҳ, бозгушоии танга ба иҷро шудани шартҳои дигар вобаста аст, ки Амрико бояд ба онҳо пойбанд бошад.

Dialog.tj