14-уми август раиси Вилояти Мухтори Кӯҳистони Бадахшон Шарифхон Сафарзода дар ноҳияи Рӯшон бо рафти корҳои сохтмонии хонаҳои истиқоматӣ барои 10 хонавода, ки бар асари сарзадани сел дар деҳаи Баррушон хароб гардида буданд, шинос шуд.

Манбаъ навиштааст, ки раиси ВМКБ ба масъулин ҷиҳати таъмини сифати баланд ва мутобиқ ба талаботи муосири сохтмонӣ бунёд намудани манзилҳо супориш дода, таъкид кард, ки корҳои сохтмонӣ бояд дар муҳлати муайянгардида ва дар асоси талаботи пурраи меъёрҳои сохтмонӣ анҷом ёбанд.

Афзуда мешавад, ки аз рӯзҳои аввали сар задани офати табиӣ Ҳукумати Ҷумҳурии Тоҷикистон барои расонидани кумакҳои ҳамаҷониба ба оилаҳои зарардида ва бартараф намудани оқибатҳои офат тадбирҳои зарурӣ андешидааст.

Ёдовар мешавем, ки дар натиҷаи якбора баланд шудани ҳарорати ҳаво ва обшавии босуръати пиряхҳо, 20-уми июл дар деҳаҳои Баррушон ва Деҳрушони ноҳияи Рӯшон сел омада, ба чанд хонаи истиқоматии деҳаҳои Баррушон ва Деҳрушон зарар расонида буд.

Dialog.tj