Кумитаи дин ва танзими ҷашну маросими назди Ҳукумати Ҷумҳурии Тоҷикистон як сокини ноҳияи Кӯшониёнро барои беэҳтиромӣ нисбат ба пули миллӣ даъват намуд.

Манбаъ навиштааст, ки Саймиддин Назаров, сокини 24-солаи ноҳияи Кӯшониён бо мақсади ба даст овардани фоидаи молиявӣ аз пули миллӣ «гулдаста» ва ҳадяҳо омода намуда, онҳоро тавассути шабакаҳои иҷтимоӣ барои фурӯш пешниҳод ва таблиғ кардааст.

“Бо дарназардошти он ки ҳадафи асосии Қонуни Ҷумҳурии Тоҷикистон "Дар бораи танзими ҷашну маросим дар Ҷумҳурии Тоҷикистон" пешгирии ҳама гуна исрофкорӣ, зиёдаравӣ, намоишкорӣ ва таҳкими эҳтиром нисбат ба арзишҳо ва муқаддасоти миллӣ мебошад, шаҳрванд Саймиддин Назаров ба Кумитаи дин ва танзими ҷашну маросими назди Ҳукумати Ҷумҳурии Тоҷикистон даъват гардида, бо иштироки масъулин бо ӯ суҳбати фаҳмондадиҳӣ баргузор карда шуд”, - омадааст дар иттилоия.

Гуфта мешавад, ки аз ҷониби масъулони Кумитаи дин ба Саймиддин Назаров моҳияти талаботи қонунгузорӣ, зарурати эҳтиром ба рамзҳо ва муқаддасоти миллӣ ҳангоми истифодаи онҳо дар фаъолияти соҳибкорӣ ва таблиғотӣ шарҳ дода шудааст.

Dialog.tj